हॅमिल्टन - भारत आणि न्यूझीलंड यांच्यात बुधवारी झालेला टी-२० सामना अटीतटीचा ठरला. भारताने या सामन्यात सुपर ओव्हरमध्ये बाजी मारली. मुख्य सामन्यात भारतीय संघ पराभूत होतोय की काय असे वाटत असताना, मोहम्मद शमीने केन विल्यम्सन आणि रॉस टेलरला बाद करत सामना सुपर ओव्हरमध्ये आणला. भारताला सुपर ओव्हरमध्ये शेवटच्या दोन चेंडूवर १० धावांची गरज होती, तेव्हा रोहित शर्माने सलग दोन उत्तुंग षटकार खेचत भारताला विजय मिळवून दिला. दरम्यान, न्यूझीलंडला हा पराभव जिव्हारी लागला असून न्यूझीलंडच्या पराभवाचे सुत्रधार मोहम्मद शमी आणि रोहित शर्माचा एक फोटो त्यांनी शेअर केला आहे.
सुपर पराभवानंतर न्यूझीलंड क्रिकेट बोर्डाने, आपल्या अधिकृत ट्विटर अकाऊंटवरुन मोहम्मद शमी आणि रोहित शर्मा यांचा एक एकत्रित फोटो शेअर केला आहे. या फोटोला दिलेल्या कॅप्शनमध्ये न्यूझीलंडने म्हटले आहे की, 'सेदान पार्कमधील आजची रात्र या दोघांसाठी खास ठरली आहे. सुरुवातीला शमीने भारताला पराभूत होण्यापासून वाचविले आणि नंतर रोहित शर्माने सुपर ओव्हरमध्ये सिक्स ठोकत भारताला विजय मिळवून दिला.'