मुंबई - महेंद्रसिंह धोनीच्या नेतृत्वाखाली खेळणाऱ्या चेन्नई सुपर किंग्ज संघाची आयपीएल २०२१ मधील सुरूवात खराब झाली. चेन्नईला आपल्या सलीमीच्या सामन्यात दिल्ली कॅपिटल्सकडून पराभवाची चव चाखावी लागली. चेन्नईच्या खेळाडूंनी पराभव विसरत स्वत: तयारी केलेल्या बिर्याणीचा आस्वाद घेतला.
चेन्नई सुपर किंग्ज संघाच्या अधिकृत ट्विटर अकाउंटवरुन एक व्हिडिओ शेअर करण्यात आला आहे. यात सुरेश रैना आणि अंबाती रायुडू हे शेफच्या वेशात दिसत आहेत. त्यांनी बिर्याणी बनवण्यासाठी खास मेहनत घेतली. यात मसाले तयार करण्यापासूनची सर्व कामे खेळाडूंनी केली.
व्हिडिओ पाहिल्यास रैनाला स्वयपाक करण्याची गोडी असल्याचे दिसते. तर बिर्याणी तयारी झाली आहे की नाही याची तपासणी तसेच चव पाहण्याचे काम अंबाती रायुडू करताना पाहायला मिळत आहे. या दोघांशिवाय संघातील अनेक खेळाडू किचनमध्ये पाहायला मिळाले. ते दुसरी डिश तयार करत होते.