दुबई - कोलकाता नाइट रायडर्स संघाने बुधवारी झालेल्या सामन्यात, सुसाट फॉर्मात असलेल्या राजस्थानला पराभवाचा धक्का देत, रॉयल्सची विजयी घोडदौड रोखली. हा सामना पाहण्यासाठी केकेआरचा सहमालक शाहरुख खान कुटुंबीयांसह स्टेडियमवर उपस्थित होता. दरम्यान, या सामन्यानंतर शाहरूख खान आणि महान खेळाडू सचिन तेंडुलकर यांनी केलेल्या ट्विटची चर्चा जोरात रंगली आहे.
केकेआरच्या विजयानंतर सचिन तेंडुलकरने ट्विट करत खेळाडूंचे कौतूक केले. शुबमन गिलची महत्त्वपूर्ण खेळी. त्याने चांगली फटकेबाजी केली. आंद्रे रसेलची छोटेखानी खेळी आणि इयॉन मॉर्गनने अंतिम टप्प्यात केलेल्या धावांमुळे केकेआरला समाधानकारक धावांचा पल्ला गाठला आला. केकेआरच्या गोलंदाजांनी अप्रतिम कामगिरी केली. त्यांनी सांघिक खेळ केला. नागरकोटीने घेतलेला झेल तर अफलातून होता, तो कसा विसरेन, असे सचिनने त्याच्या ट्विटमध्ये म्हटलं.