दुबई - आयपीएल २०२०मध्ये सलग दोन पराभवानंतर सनरायझर्स हैदराबाद संघावर टीकेची झोड उठली आहे. तसेच, कर्णधार डेव्हिड वॉर्नरच्या नेतृत्वावर शंका उपस्थित केली जात आहे. कारण, न्यूझीलंडचा कर्णधार केन विल्समसनला वॉर्नरने दोन्ही सामन्यात, संधी दिलेली नव्हती. विल्समसन एक अनुभवी खेळाडू असून त्याला संघात स्थान मिळायला हवे, असे क्रिकेट जाणकारांचे मत आहे. अशात वॉर्नरने विल्समसनला मधल्या फळीत उतरवण्याचे संकेत दिले आहेत.
कोलकाताविरुद्धच्या पराभवानंतर वॉर्नर म्हणाला की, मधल्या फळीतील फलंदाजांनी संथ फलंदाजी केली. यामुळे आम्हाला अजून 20-30 धावा कमी पडल्या. या धावा झाल्या असत्या तर, सामना अजून रंगतदार झाला असता. आम्हाला मधल्या फळीत सुधारणा करावी लागेल, यासाठी आम्ही उपाययोजना आखत आहोत, असे वॉर्नरने सांगितले.
वॉर्नरने आखलेल्या व्यूहरचनेप्रमाणे पुढील सामन्यात केन विल्यमसनला अंतिम संघात स्थान दिले जाणार असल्याचे समजते. सध्याच्या घडीला सनरायझर्स हैदराबादचा संघ मधल्या फळीमध्ये धावांसाठी झगडत असल्याचे पाहायला मिळत आहे. त्यामुळे पुढील सामन्यात केन विल्यमसन पुन्हा मैदानात आल्यास संघाची मधली फळी सावरण्याची शक्यता आहे.
सनरायझर्सचा सामना उद्या (ता. २९) दिल्ली कॅपिटल्सशी होणार आहे. या सामन्यात हैदराबादचा संघ कशी कामगिरी करणार हे महत्वाचं ठरणार आहे.