मुंबई - भारताचा अष्टपैलू खेळाडू जयंत यादवने लग्नगाठ बांधली. त्याने तिची गर्लफ्रेंड दिशा चावला हिच्याशी सात फेरे घेतले. जयंतच्या लग्नाची बातमी युझवेंद्र चहलने फोटो शेअर करत दिली. यात त्याने जयंत आणि दिशा या दोघांना लग्नाबद्दल शुभेच्छा दिल्या आहेत.
जयंत आणि दिशा या दोघांनी २०१९ मध्ये साखरपूडा उरकला होता. त्यावेळी जयंत आयपीएलमध्ये मुंबई इंडियन्स संघाचा सदस्य होता. मुंबईने यावेळी त्यालारिटेन केले आहे. जयंतने भारताकडून आतापर्यंत चार कसोटी आणि एक एकदिवसीय सामना खेळला आहे.
जयंतने डेब्यू कसोटी सामन्यात ६२ धावांसह ४ विकेट घेतल्या होत्या. जयंतच्या नावे एक शतक देखील आहे. त्याने नंबर ९ वर येत शतक झळकावले होते. अशा कारनामा करणारा जयंत भारताचा पहिला खेळाडू आहे. त्याने हा कारनामा २०१६ मध्ये इंग्लंडविरुद्ध मुंबईत खेळताना केला आहे.
मागील काही महिन्यात अनेक क्रिकेटपटू लग्नबंधनात अडकले आहेत. यात युझवेंद्र चहल, जयदेव उनाडकट, विजय शंकर यांचा समावेश आहे. आता यात जयंत यादवचाही समावेश झाला आहे.