विशाखापट्टणम - भारताचा सलामीवीर फलंदाज मयांक अग्रवालने दक्षिण आफ्रिकेविरुध्दच्या कसोटी सामन्यात द्विशतक झळकावले. विशाखापट्टण येथील के. राजशेखर रेड्डी मैदानावर सुरू असलेल्या पहिल्या कसोटीत सामन्यात मयांकने कारकीर्दीमधील पहिले द्विशतक ठोकत २१५ धावा केल्या. आपल्या पाचव्याच कसोटी सामन्यात त्याने ही कामगिरी केली आहे. दरम्यान, आफ्रिकेविरुध्द द्विशतक ठोकणारा मयांक भारताचा दुसरा सलामीवीर खेळाडू ठरला आहे.
सामन्याच्या पहिल्या दिवशी मयांक ८४ धावांवर नाबाद होता. आज दुसऱ्या दिवशी त्याने आपले शतक पूर्ण केले. याच शतकाचे रूपांतर त्याने द्विशतकात करत त्याने जबरदस्त खेळी केली. मयांकने ३५८ चेंडूत द्विशतक साजरे केले. यात २२ चौकार आणि ५ षटकारांचा समावेश आहे. मयांक २१५ धावांवर बाद झाला.
मयांकने २०१८ मध्ये 'बॉक्सिंग डे'निमित्त आयोजित कसोटी सामन्यातून ऑस्ट्रेलियाविरुध्द कसोटी क्रिकेटमध्ये पदार्पण केले होते. या सामन्यात त्याने ७६ धावांची खेळी केली होती.