दुबई - इंग्लंड आणि पाकिस्तान यांच्यातील ३ सामन्याची टी-२० मालिका १-१ अशी बरोबरीत सुटली. तिसरा सामना पाकिस्तानने ५ धावांनी जिंकला. या मालिकेनंतर आयसीसीने आज टी-२० क्रिकेटची ताजी क्रमवारी जाहीर केली आहे.
आयसीसीच्या ताज्या क्रमवारीनुसार, पाकिस्तानचा कर्णधार बाबर आझम अव्वलस्थानी कायम आहे. तर पाकविरुद्धच्या मालिकेत चांगली कामगिरी करणारा इंग्लंडचा डेव्हिड मलान टॉप-५ मध्ये पोहोचला आहे. या यादीत टॉप-१० मध्ये भारताचा के एल राहुल दुसऱ्या तर विराट कोहली दहाव्या स्थानावर आहे.
इंग्लंडच्या टॉम बॅटनला देखील क्रमवारीत फायदा झाला आहे. पावसामुळे वाया गेलेल्या पहिल्या सामन्यात बॅटनने ७१ धावांची खेळी केली होती. तो १५२ स्थानांची झेप घेत ४३ व्या स्थानावर पोहोचला आहे. इंग्लंडच्या जॉनी बेअरस्टोने एक स्थान वर चढत २२ वे स्थान पटकावले आहे. मालिकावीर हाफीजने ६८ व्या स्थानावरून ४४ व्या स्थानावर उडी घेतली.