मुंबई - भारतीय महिला क्रिकेट संघाची सलामीवीर स्मृती मंधाना आक्रमक फलंदाज तर आहेच, यासोबत ती हजरजबाबी असल्याचे दिसून आले. स्मृतीला तुझ्या होणाऱ्या साथीदारासाठी काय निकष आहेत, असे विचारले असता, तिने मजेशीर उत्तर दिले.
कोरोनामुळे सर्व क्रीडा स्पर्धा ठप्प आहेत. यामुळे खेळाडू आपापल्या घरीच कुटुंबीयांसोबत वेळ घालवत आहेत. या काळात बीसीसीआयच्या BCCI Women या अधिकृत ट्विटर हँडलने क्रिकेट चाहत्यांना स्मृतीला त्यांच्या मनातले प्रश्न विचारण्याची संधी दिली.
तेव्हा चाहत्यांनी या संधीचा लाभ घेत स्मृतीला क्रिकेटविषयी तसेच तिच्या वैयक्तिक आयुष्याबद्दल अनेक प्रश्न विचारले. एका चाहत्याने तर स्मृतीला तुझ्या होणाऱ्या साथीदारासाठी काय निकष आहेत, असा प्रश्न विचारला. यावर स्मृतीने मजेशीर उत्तर दिले.
ती म्हणाली, माझ्या दोन अटी आहे. यात पहिली, त्याने माझ्यावर प्रेम केलं पाहिजे आणि दुसरी म्हणजे, त्याने पहिली अट पूर्ण केली पाहिजे. या उत्तरावरून स्मृती हजरजबाबी असल्याचेही दिसून आले.