लीड्स - विश्वकरंडक स्पर्धेमध्ये हेडिंग्ले क्रिकेट मैदानावर शुक्रवारी श्रीलंकेसमोर बलाढ्य इंग्लंडचे आव्हान असणार आहे. हा सामना दुपारी ३ वाजता सुरू होईल. ईऑन मॉर्गन नेतृत्वात खेळणारा इंग्लंड सध्या तुफान फॉर्मात असून आतापर्यंत या स्पर्धेत त्यांनी ५ सामन्यांमध्ये ४ सामन्यात विजय मिळवत ८ गुणांसह तिसरे स्थान पटकावले आहे. तर श्रीलंकेचा संघ ४ गुणांसह सहाव्या स्थानी आहे. श्रीलंकेने आतापर्यंत ५ सामने खेळले असून त्यातील एका सामन्यात त्यांना विजय मिळवण्यात यश आले आहे. तर २ सामन्यात पराभव झाला असून २ सामने अनिर्णित राहिले आहे.
या विश्वकरंडक स्पर्धेत यजमान इंग्लंडला विजेतेपदाचे प्रबळ दावेदार मानले जात आहे. ईऑन मॉर्गन, जेसन रॉय, जॉनी बेअरस्टो, जोस बटलर, जो रूट आणि बेन स्टोक्स अशा तुफानी फलंदाजांचा भरणा इंग्लंडकडे आहे. त्यामुळे या सामन्यात धावांचा पाऊस पडण्याची दाट शक्यता आहे.