'स्टेनगन'ची कसोटी क्रिकेटमधून निवृत्ती; विराट कोहलीने दिल्या खास शुभेच्छा

दक्षिण आफ्रिकेचा ३६ वर्षीय जलदगती गोलंदाज डेल स्टेनने कसोटी क्रिकेटमधून निवृत्तीची घोषणा केली. यानंतर भारतीय कर्णधार विराट कोहलीने स्टेनला शुभेच्छा दिल्या आहेत. तो म्हणतो, तू या खेळाचा चॅम्पियन आहेस. निवृत्तीनंतर तुझे आयुष्य छान जावो.

नवी दिल्ली - दक्षिण आफ्रिकेचा ३६ वर्षीय जलदगती गोलंदाज डेल स्टेनने कसोटी क्रिकेटमधून निवृत्तीची घोषणा केली. स्टेन हा जगातील एकमेव वेगवान गोलंदाज आहे, ज्याने कसोटी खेळणाऱ्या ९ देशांविरुद्ध एका डावात ५ गडी बाद करण्याचा पराक्रम केला आहे. स्टेनच्या निवृत्तीच्या घोषणेवर भारतीय कर्णधार विराट कोहलीने ट्विट करत शुभेच्छा दिल्या आहेत. तो म्हणतो, 'तू या खेळाचा चॅम्पियन आहेस. निवृत्तीनंतर तुझे आयुष्य छान जावो'

डेन स्टेनने जरी कसोटीमध्ये निवृत्ती जाहीर केली असली, तरी तो एकदिवसीय आणि टी-२० प्रकारात खेळणार आहे. जगभरातील दिग्गज फलंदाजांना स्टेनने आपल्या धारधार गोलंदाजीने जेरीस आणले आहे. मात्र, मागील काही महिन्यांपासून स्टेनला दुखापतीने ग्रासले आहे. नुकत्याच झालेल्या विश्वकरंडक स्पर्धेत दुखापतीमुळे स्टेनने स्पर्धेतून माघार घेतली होती.

भारतीय कर्णधार विराट कोहली आणि डेल स्टेन इंडियन प्रीमिअर लीगमध्ये बंगळुरू संघाकडून खेळतात. यामुळे या दोघांमध्ये चांगले ऋणानुबंध आहेत. यामुळे विराटने स्टेनला शुभेच्छा दिल्या आहेत. स्टेनने दक्षिण आफ्रिका संघाकडून ९३ कसोटी सामने खेळले असून यामध्ये त्याने ४३९ बळी घेतले आहेत.

आयपीएलमध्ये रॉयल चॅलेंजर्स बंगळुरुकडून खेळताना डेल स्टेनने १५६.२ किलोमीटर प्रतितास वेगाने चेंडू टाकला होता. तसेच त्याने आंतरराष्ट्रीय क्रिकेटमध्ये १५५.७ किलोमीटर प्रतितास वेगाने चेंडू टाकला आहे. त्याने २००७ साली सेंच्युरियन येथे झालेल्या न्यूझीलंडविरुध्दच्या सामन्यात फलंदाज क्रेग कमिंगला आपल्या वेगवान चेंडूने जखमी केले होते. त्यावेळी स्टेनच्या चेंडूने जखमी झालेल्या कमिंगला थेट आयसीयूमध्ये दाखल करण्यात आले होते.