मुंबई -टीम इंडियाचा युवा फलंदाज मनीष पांडे आज मुंबईत लग्नाच्या बेडीत अडकला. दाक्षिणात्य अभिनेत्री अश्रिता शेट्टीसह मनीषने लग्नगाठ बांधली. काल रविवारी पार पडलेल्या सय्यद मुश्ताक अली टी-२० स्पर्धेत मनीषच्या नेतृत्वाखाली कर्नाटकने विजेतेपद मिळवले आहे.
हेही वाचा -थरारक!..शेवटच्या चेंडूपर्यंत रंगतदार झालेल्या सामन्यात कर्नाटक विजयी
काल तमिळनाडूविरूद्ध झालेल्या सामन्यानंतर मुलाखतीमध्ये मनीषने लग्नाबद्दल सांगितले. अंतिम सामन्यात कर्नाटकने एका धावेने तामिळनाडूचा पराभव केला. या सामन्यात मनीषने ६० धावांची खेळी केली. ६ डिसेंबरपासून सुरू होणाऱ्या विंडीजविरूद्धच्या मालिकेसाठी मनीषला टीम इंडियात स्थान मिळाले आहे. सय्यद मुश्ताक अली टी-२० स्पर्धेच्या विजेतेपदासोबतच कर्नाटकने तमिळनाडूचाच पराभव करत विजय हजारे ट्रॉफीचेही विजेतेपद पटकावले होते.
कोण आहे अश्रिता शेट्टी ?
अश्रिता शेट्टी ही दाक्षिणात्य फिल्म इंडस्ट्रीमधील अभिनेत्री आहे. तिने इंद्रजीत, उद्यम एनएच ४ आणि ओरू कन्नियुम मुनू कलावनीगलूम या चित्रपटात अभिनय केला आहे.