लंडन - क्रिकेट विश्वात प्रतिष्ठित मानली जाणारी अॅशेस मालिका सुरु आहे. या मालिकेतील तिसरा कसोटी सामना रोमहर्षक झाला. यात बेन स्टोक्सच्या अविश्वसनीय खेळीने इंग्लंडने बाजी मारली. इंग्लंडने हा सामना १ विकेटने राखून जिंकला. या विजयाबरोबरच इंग्लंडने या मालिकेतील आव्हानही कायम ठेवत १-१ अशी बरोबरी साधली.
इंग्लंडच्या या विजयाचा शिल्पकार ठरला अष्टपैलू क्रिकेटपटू बेन स्टोक्स. त्याने दुसऱ्या डावात नाबाद १३५ धावांची शतकी खेळी केली. त्याने शेवटच्या विकेटसाठी जॅक लीचबरोबर महत्त्वपूर्ण नाबाद ७६ धावांची भागीदारीही रचली आणि इंग्लंडला विजय मिळवून दिला. या भागीदारीमध्ये लीचने १७ चेंडू खेळताना केवळ १ धावेचे योगदान दिले होते. तर स्टोक्सने यात झंझावती खेळी करत ७५ धावा केल्या होत्या.