आबुधाबी - मुंबई इंडियन्सविरुद्धच्या सामन्याने कोलकाता नाइट रायडर्सचा संघ आयपीएलच्या तेराव्या हंगामाची सुरूवात करणार आहे. उभय संघातील हा सामना २३ तारखेला होणार आहे. त्याआधी कोलकात्याचे खेळाडू सध्या कसून सराव करत आहेत. सरावादरम्यान, वेस्ट इंडिजचा स्फोटक अष्टपैलू खेळाडू आंद्रे रसेलने चेंडू टोलावत कॅमेऱ्याची काच फोडली. याचा व्हिडिओ कोलकाताने आपल्या अधिकृत्त ट्विटर अकाउंटवरून शेअर केला आहे.
कोलकाता नाइट रायडर्सने शेअर केलेल्या व्हिडिओत, रसेल नेटमध्ये सरावादरम्यान, तुफान वेगाने चेंडू टोलावताना पाहायला मिळत आहे. तो मैदानाच्या चौफेर बाजूने चेंडू टोलावत आहे. याचवेळी नेट्समध्ये लावलेल्या कॅमेऱ्यालाही रसेलच्या फटकेबाजीचा बळी व्हावे लागले. रसेलचा एक जोरदार फटका थेट कॅमेऱ्याच्या काचेवर जाऊन आदळला आणि त्या कॅमेऱ्याचा चक्काचूर झाला.