नवी दिल्ली - पाकिस्तानमध्ये खेळवण्यात येणाऱ्या आशिया चषक क्रिकेट स्पर्धा २०२० ला बीसीसीआयने विरोध दर्शवला आहे. यामुळे आशिया चषक पाकिस्तामध्ये होणार की नाही, याबाबत अनिश्चितता आहे. पाकिस्तान क्रिकेट बोर्डाच्या एका अधिकाऱ्याने आशिया चषक संदर्भातील निर्णय आशियाई क्रिकेट परिषद करेल, असे सांगितले.
भारतीय संघाचा आशिया चषक स्पर्धेतील सहभागाबाबत बीसीसीआयने कोणतेही घोषणा केलेली नाही. कारण ही स्पर्धेचे यजमानपद पाकिस्तानकडे आहे. भारत आणि पाकिस्तान यांच्यात २६/११ दहशतवादी हल्ल्यानंतर अजूनही तणावाचे वातावरण आहे. त्यामुळे दोन्ही देशांमधील क्रिकेट मालिका अजूनही खेळवल्या जात नाहीत. पाकिस्तानने दहशतवाद्यांना पोसायचे बंद करावे, त्यानंतरच पाकसोबत क्रिकेट खेळले जाईल हा पावित्रा भारताने अद्याप कायम ठेवला आहे.
दहशतवाद या कारणाने पाकिस्तानच्या खेळाडूंना भारतामध्ये खेळण्यास परवानगी नाकारण्यात आलेली आहे, त्याचबरोबर भारताचे खेळाडू पाकिस्तानमध्ये जाऊन खेळण्यास तयार नाहीत. बीसीसीआयने त्रयस्थ ठिकाणी पाकिस्तानबरोबरची मालिका खेळायला परवानगी दिलेली नाही.