मँचेस्टर - कोरोनानंतर इंग्लंड आणि वेस्ट इंडिजदरम्यान पहिली आंतरराष्ट्रीय कसोटी मालिका खेळवली जात आहे. या मालिकेतील दुसरा सामना आज मँचेस्टरच्या ओल्ड ट्रॅफर्ड मैदानावर खेळवला जाणार आहे. पहिल्या कसोटी सामन्यात वेस्ट इंडिजने यजमान इंग्लंडवर चार गडी राखून विजय मिळवला होता. या विजयासह तीन सामन्यांच्या मालिकेत विंडीजने 1-0 अशी आघाडी घेतली आहे. दुसऱ्या कसोटी सामन्यात जो रुट इंग्लंडच्या संघाचे नेतृत्व करणार आहे.
मालिकेत आपले अस्तित्व टिकवण्यासाठी इंग्लंडचा संघ मैदानावर उतरेल तर दुसरा सामना जिकूंन मालिका खिशात घालण्यासाठी वेस्ट इंडिजचा संघ प्रयत्न करेल. कर्णधार जोर रूटच्या आगमनाने यजमानांची फलंदाजी मजबूत झाली आहे मात्र, तरीही त्यांना वेस्ट इंडिजपासून सावधान राहावे लागणार आहे. आपल्या दुसऱ्या अपत्याच्या जन्मामुळे पहिल्या कसोटी सामन्यातून रूटने माघार घेतली होती.