सिंगापूर ओपन बॅडमिंटन : समीर वर्मापाठोपाठ एच. एस. प्रणॉयचाही दुसऱ्या फेरीत प्रवेश

दूसऱ्या फेरीत प्रणॉयचा सामना जापानच्या केंटो मोमोटाशी

सिंगापूर -पुरुष एकेरीत समीर वर्मापाठोपाठ भारताचा दुसरा बॅडमिंटनपटू एच. एस. प्रणॉयनेही सिंगापूर ओपन बॅडमिंटन स्पर्धेच्या दुसऱ्या फेरीत प्रवेश केला आहे. पहिल्या फेरीत १ तास ३ मिनीटे चाललेल्या सामन्यात प्रणॉयने फ्रान्सच्या ब्राईस लेवरडेजवर 11-21, 21-16, 21-18 असा विजय मिळवत स्पर्धेतील आव्हान कायम ठेवले आहे.

स्पर्धेच्या दूसऱ्या फेरीत प्रणॉयचा सामना हा दिग्गज खेळाडू आणि बॅडमिंटनच्या जागतिक क्रमवारीत अव्वल असलेल्या जापानच्या केंटो मोमोटाशी होणार आहे. मोमोटाने पहिल्या फेरीत भारताच्या बी-साई प्रणीतला 19-21, 21-14, 22-20 ने पराभुत करत दुसरी फेरी गाठली आहे.

सिंगापूर ओपनमध्ये समीर आणि प्रणॉय यांच्यापूर्वी आज भारताच्या सायना नेहवाल आणि पी. व्ही. सिंधू यांनीही दुसऱ्या फेरीत आपली जागा पक्की केली आहे.