सोनी मराठीच्या प्रेक्षकांसाठी यंदाचा गणेशोत्सव, बाप्पांच्या आगमनाबरोबरच 'एक्स्ट्रा' मनोरंजनाचा उत्सव ठरणार आहे. येत्या रविवारपासून, पाच सप्टेंबरपासून सातही दिवस मनोरंजनाचा उत्सव साजरा होणार आहे. 'गाथा नवनाथांची', 'तू सौभाग्यवती हो' आणि 'वैदेही' या तिन्ही लोकप्रिय मालिका आठवड्यातले सातही दिवस, सोमवार ते रविवार, प्रेक्षकांच्या भेटीला येतील. खानदानी श्रीमंत कुटुंबाची सून झालेली, पण वयानी अल्लड, खट्याळ असणार्‍या ऐश्वर्याच्या निरागस संसाराची गोष्ट ‘तू सौभाग्यवती हो’ ही मालिका रंगतदार वळणावर असून आपल्या नवर्‍यानी एकदातरी प्रेम व्यक्त करावं, ही ऐश्वर्याची आणि प्रेक्षकांची इच्छा देव पूर्ण करेल का, हा उत्सुकतेचा मुद्दा आहे.
दिव्य शाबरी मंत्र सर्वशक्तीने सिद्ध होण्याचा भव्यपट 'गाथा नवनाथांची' या मालिकेत सुरू असून मच्छिंद्रनाथांचं वेताळाबरोबर होणारं युद्ध प्रेक्षकांना खिळवून ठेवणारं आहे. भव्य ग्राफिक्स, आध्यात्मिक कथानकाची नेमकी, अभ्यासपूर्ण मांडणी आणि कलावंतांचा अप्रतिम अभिनय यांमुळे 'गाथा नवनाथांची' अल्पावधीतच लोकप्रियतेच्या शिखरावर आहे.