मुंबई - बॉलिवूड अभिनेता सुशांत सिंग राजपूतचा काही दिवसांपूर्वीच 'सोनचिडियां' हा चित्रपट प्रदर्शित झाला. त्यापूर्वी सारा अली खानसोबत तो 'केदारनाथ' चित्रपटातही झळकला होता. अभिनयासोबतच सुशांतला वेगवेगळे गॅजेट्सही हाताळायला आवडतात. त्याच्या इन्स्टाग्राम अकाऊंटवर त्याच्या फोटोंसोबतच वेगवेगळ्या गॅजेट्सविषयीची माहितीही मिळते. त्याने अलिकडेच एक व्हिडिओ शेअर केला आहे. या व्हिडिओत तो चक्क विमान उडवताना दिसत आहे.
हा व्हिडिओ शेअर करून त्याने सध्या तो विमान उडविण्याचे प्रशिक्षण घेत असल्याचे सांगितले आहे. सुशांतने काही दिवसांपूर्वीच बोईंग ७३७ फिक्स्ड बेस फ्लाईट सिम्युलेटर खरेदी केले आहे. त्याला विमान उडविण्याचे लायसन्सदेखील मिळाले आहे. 'खूप दिवसांपासून माझे आकाशात भरारी घेण्याचे स्वप्न होते. आज मी ते पूर्ण करत आहे', असे सुशांतने म्हटले आहे. त्याच्या या व्हिडिओवर चाहत्यांनीही अनेक प्रतीक्रिया दिल्या आहेत.
सुशांतच्या चित्रपटांबाबत सांगायचे झाल्यास, लवकरच तो 'छिछोरे' चित्रपटातून प्रेक्षकांच्या भेटीला येणार आहे. अभिनेत्री श्रद्धा कपूरसुद्धा यामध्ये त्याच्यासोबत भूमिका साकारणार आहे. दिग्दर्शक नितेश तिवारी हे या चित्रपटाचे दिग्दर्शन करत आहेत. यासोबतच 'दिल बेचारा' चित्रपटासाठीही सुशांतची वर्णी लागली आहे. या चित्रपटाचे दिग्दर्शन मुकेश छाबरा करत आहेत.