‘सूर नवा ध्यास नवा - आशा उद्याची’ महाअंतिम सोहळा : कोण असेल महाराष्ट्राची महागायिका?

मराठी म्युझिक रियालिटी शो ‘सूर नवा ध्यास नवा’ प्रेक्षकांना खूप भावतोय. कोरोना काळातील लॉकडाऊनमध्ये याचे ‘आशा उद्याची’ हे नवीन पर्व सुरु झाले होते आणि आता याची महाअंतिम फेरी येऊन ठेपलीय. अंतिम फेरीत आता सहा गायिका पोहोचल्या असून ‘सूर नवा ध्यास नवा - आशा उद्याची’ चा महाअंतिम सोहळा १३ जून रोजी पार पडणार आहे.

छोट्या पडद्यावर रियालिटी शोजच्या जमान्यात एक मराठी म्युझिक रियालिटी शो ‘सूर नवा ध्यास नवा’ प्रेक्षकांना खूप भावतोय. कोरोना काळातील लॉकडाऊनमध्ये याचे ‘आशा उद्याची’ हे नवीन पर्व सुरु झाले होते आणि आता याची महाअंतिम फेरी येऊन ठेपलीय. मराठी मनांवर अधिराज्य गाजवणारी प्रेक्षणीय, स्पृहणीय आणि श्रवणीय अशी सप्तसूरांची मैफिल म्हणजे कलर्स मराठीवरील ‘सूर नवा ध्यास नवा’ हा शो. या रंगतदार महाअंतिम सोहळ्यात “सूर नवा ध्यास नवा” चे लोकप्रिय कॅप्टन्स महाराष्ट्राचा लाडका रॅाकस्टार संगीतकार अवधूत गुप्ते आणि शास्त्रीय संगीताचा वारकरी महेश काळे यांचीही अदाकारी रसिकांना अनुभवता येणार आहे. तसेच या पर्वाचा संगीत समुपदेशक, गायक, संगीतकार अजित परब, तरूणांचा लाडका गायक स्वप्नील बांदोडकर, लोक कलावंत नागेश मोरवेकर यांचे भन्नाट परफॅार्मन्स या सोहळ्याची रंगत वाढवणार आहेत.

‘सूर नवा ध्यास नवा - आशा उद्याची’

“सूर नवा ध्यास नवा”चं हे चौथं म्हणजेच फक्त गायिकांचं पर्व खूपच खास ठरलं. कोरोनाच्या कसोटीच्या काळात खूप चिकाटीने आणि धैर्याने "सूर नवा"च्या संपूर्ण टीमने अथकपणे हा सुरांचा महायज्ञ सुरू ठेवला आणि रसिकजनांना मनोरंजनाची ही संजीवनी दिली. अवघ्या १६ गायिकांबरोबरच हा प्रवास सुरू झाला परंतु हे सोळाही सूर महाराष्ट्राच्या कानाकानांत, मनामनांत गुंजत राहिले. या गायिकांच्या सुरेल गाण्यांनी अवघ्या महाराष्ट्राला मंत्रमुग्ध केलं, गायिकांच्या सुरांना संपूर्ण महाराष्ट्राने पसंती दिली. विविध शैलींची गाणी अत्यंत सहजतेने सादर करून कॅप्टन्सची आणि महाराष्ट्रातील तमाम प्रेक्षकांची मनं या गायिकांनी जिंकली. मात्र या १६ पैकी सहा गायिकांनी वैविध्यपूर्ण गाणी सादर करून आपली विशेष छाप सोडली आणि महाअंतिम फेरी गाठली. आता अल्पावधीत महाराष्ट्राच्या लाडक्या ठरलेल्या या सहा गायिका सज्ज झाल्या आहेत, महाअंतिम सोहळ्यासाठी. ही चुरस खूप उत्कंठा वाढवणारी असणार आहे. सुरांची खरी कसोटी इथे लागणार आहे.

कोरोनाच्या या कसोटीच्या परिस्थितीला तोंड देत या १६ जणींनी महाराष्ट्राच्याच नाही तर भारतभरातून ‘सूर नवा ध्यास नवा ‘च्या देदीप्यमान अशा महामंचावर दाखल झाल्या. सुरांचा हा मंच मोठ्या मेहनतीने सजवला, गाजवला आणि अधिकाधिक तेजोमय केला. या १६ सुरेल गायिकांमधून सहाजणींनी महाअंतिम फेरीत मानाचं स्थान मिळवलं. अहमदनगरची सन्मिता धापटे-शिंदे, डोंबिवलीची प्रज्ञा साने, बारामतीची राधा खुडे, पुण्याच्या श्रीनिधी देशपांडे आणि रश्मी मोघे तसेच कोल्हापूरची संपदा माने यांनी अटीतटीच्या या स्पर्धेत आपल्या सुरांनी रसिकांची आणि कॅप्टन्सची दाद मिळवत महाअंतिम फेरीत अव्वल स्थान मिळवलं.

या सहाजणींना “सूर नवा ध्यास नवा” च्या या मंचावर खऱ्या अर्थानं आपापला ‘नवा सूर’ सापडला. पण आता कळणार आहे, या सहाजणींपैकी कुणाचा महागायिका बनण्याचा ध्यास खरा ठरतो व कुणाच्या हाती मानाची सुवर्णकट्यार विराजमान होते आणि कोण ठरतेय, महाराष्ट्राची आशा उद्याची.

‘सूर नवा ध्यास नवा - आशा उद्याची’ चा महाअंतिम सोहळा १३ जून रोजी संध्याकाळी कलर्स मराठी वाहिनीवर प्रसारित होणार आहे.

हेही वाचा -इटालियन आर्टिस्टनं विकलं 'अस्तित्वात' नसलेलं शिल्प; रितेश देशमुख म्हणतो, खरे कलाकार तर आम्हीच!