आधुनिक काळात आणि खासकरून इंटरनेटच्या जमान्यात सोशल मीडियावर वावरणाऱ्या तरुणाईची एक वेगळी भाषा तयार झालीय तसेच बरेच नवनवीन शब्द सर्रास वापरात आहेत, ज्यात ‘वायरल’ हा शब्द देखील मोडतो. हल्लीच्या गाण्यांतूनही या नव्या शब्दांचा वापर होताना दिसतोय. मराठी तरुणाईचा लाडकर गायक रोहित राऊत त्याच्या हृदयात वाजे समथिंग, हे नाते कोणते अशा सुपरहिट गाण्यांसाठी प्रसिद्ध आहे. तो आता “वायरलवाली Love Story" घेऊन येत आहे. सप्तसूर म्युझिकच्या युट्यूब चॅनलवर वायरलवाली Love Story हा नवा कोरा म्युझिक व्हिडिओ लाँच करण्यात आला आहे.
सप्तसूर म्युझिक आणि नवसत्य एंटरटेन्मेंट यांनी वायरलवाली Love Story हा म्युझिक व्हिडिओ प्रस्तुत केला आहे. रोहित राऊतला या गाण्यात गायिका सोनाली सोनावणेची साथ लाभली आहे. या दोघांनी "वायरलवाली Love Story" हे धमाकेदार गीत गायलं आहे. सप्तसूर म्युझिकचे "जोडी दोघांची दिसते चिकणी" हे सोनाली सोनावणेचे गाणंही हिट आहे. "वायरलवाली Love Story" म्युझिक व्हिडिओचं दिग्दर्शन नवनाथ निकम यांनी केलं आहे. शालू देवतळे थूल यांनी गीतलेखन आणि संगीत दिग्दर्शनाची जबाबदारी निभावली आहे. स्वप्नील अर्पेल यांनी छायांकन केलं आहे. तर निधी साळवे आणि आदी मांडवकर ही नवी जोडी या म्युझिक व्हिडिओत झळकली आहे.