गेल्या वर्षी ‘इंडियन आयडॉल’ च्या ११ व्या सत्रात मराठमोळा गायक रोहित राऊत दुसऱ्या स्थानावर होता. त्याचा संगीतप्रवास मात्र लहानपणापासूनच सुरु झाला होता. झी मराठीच्या संगीत रियालिटी शो सारेगमप लिटिल चॅम्प्समध्ये त्याने भाग घेतला होता आणि संगीतरसिकांच्या गळ्यातील ताईत बनला होता. या शो मध्ये सगळ्यात 'रॉकींग परफॉर्मन्स' लातूरच्या रोहित राऊतचा असायचा. प्रेक्षकही रोहितला 'रॉक स्टार' म्हणून ओळखायला लागले. रोहितने संगीत क्षेत्रात स्वतःची ओळख निर्माण केली असून आता पुन्हा एकदा लिटिल चॅम्प्सच्या नव्या पर्वात रोहित ज्यूरीच्या भूमिकेतून प्रेक्षकांच्या भेटीस येणार आहे. त्याबद्दल त्याने आपले मनोगत व्यक्त केले.
‘सारेगमप लिटिल चॅम्प्स’चं नवीन पर्व सुरु होणार आहे. त्याविषयी सांगताना तो म्हणाला, ‘१२ वर्षांनी पुन्हा एकदा लिटिल चॅम्प्स प्रेक्षकांच्या भेटीस येणार आहे या गोष्टीचा मला खूप आनंद आहे. खूप कमालीचं टॅलेंट या पर्वात सहभागी होणार आहे. एका तपानंतर हे पर्व प्रेक्षकांच्या भेटीस येतंय त्यामुळे स्पर्धेतील आणि स्पर्धकांमधील फरक प्रेक्षकांना अनुभवायला मिळेल. आम्ही या नव्या पर्वासाठी खूप जास्त उत्सुक आहोत आणि आम्ही तितकीच धमाल देखील करतोय. प्रेक्षकांना देखील हे पर्व बघताना तितकीच मजा येईल.’
यावेळी स्पर्धक नाही तर ज्युरींच्या भूमिकेत असण्याबद्दल तो बोलला, ‘एक स्पर्धक म्हणून आम्ही केलेल्या तयारीपेक्षा आता निभावत असलेल्या ज्यूरीच्या भूमिकेसाठी आम्ही सर्वजण खूप जास्त तयारी करतोय. कारण आता आमची जबाबदारी वाढली आहे. त्यामुळे या १२ वर्षात आलेली आणि त्याधीची गाणी, आम्ही स्पर्धेत सादर केलेली गाणी यासर्वांचा आम्ही सखोल अभ्यास करतोय. आताचे लिटिल चॅम्प्स खूप कमालीचे आहेत त्यामुळे त्यांच्या सादरीकरणानंतर आम्ही त्यांचे मोठे ताई आणि दादा म्हणून त्यांना मार्गदर्शन करणार आहोत. त्यांची कुठे चूक झाली तर त्यांना न दुखावता त्यांना ती समजवून सांगायची जबाबदारी देखील आमच्यावर आहे. हे सगळे लिटिल चॅम्प्स खूप अभ्यास करून आले आहेत त्यामुळे आम्ही देखील तितकीच जोमाने तयारी करतोय.’
‘सारेगमप लिटिल चॅम्प्स' या कार्यक्रमात ‘पंचरत्न’ म्हणून प्रसिद्ध झालेले, कार्तिकी गायकवाड, मुग्धा वंशयपायन, प्रथमेश लघाटे, आर्या आंबेकर आणि रोहित राऊत हे सर्वजण ज्युरीची भूमिका निभावणार आहेत. यावर प्रतिक्रिया देताना तो म्हणाला, ‘या कार्यक्रमामुळे आम्हाला अफाट लोकप्रियता मिळाली. जगाच्या कान्याकोपऱ्यातून आम्हाला प्रेक्षकांचं प्रेम मिळालं त्यामुळे या मंचावर एका वेगळ्या भूमिकेतून परत येताना खूप जास्त आनंद होतोय. सारेगमपमुळे आम्ही पंचरत्न म्हणून नावारूपाला आलो, १२ वर्षानंतर देखील आमची मैत्री तितकीच घट्ट आहे, आम्ही एकत्र काम देखील केलं आहे. त्यामुळे आता पुन्हा एकदा एकत्र या मंचावर येऊन आम्ही खूप धमाल करतोय आणि जुन्या आठवणींना उजाळा देतोय.’