मराठी आणि हिंदी मनोरंजनसृष्टीत मोठ्या पडद्यावर विविधांगी भूमिका साकारणारा अभिनेता संजय नार्वेकर बऱ्याच काळानंतर छोट्या पडद्यावर प्रेक्षकांचे मनोरंजन करण्यासाठी सज्ज झालाय. ‘वास्तव’ मधील ‘देड फुट्या’ या संजय दत्तच्या मित्राची भूमिका करणारा संजय नार्वेकर आता ‘तुझ्या इश्काचा नादखुळा’ या मालिकेत इन्स्पेक्टरच्या भूमिकेत दिसणार आहे. स्टार प्रवाहाच्या या मालिकेत धमाकेदार वळण येणार असून सुप्रसिद्ध अभिनेता संजय नार्वेकर याची धडाकेबाज एण्ट्री होणार आहे. लवकरच मालिकेत इन्सपेक्टर गौतम साळवी यांच्या रुपात सुप्रसिद्ध अभिनेते संजय नार्वेकर दिसेल. बऱ्याच वर्षांनंतर संजय मालिका विश्वात पुनःपदार्पण करणार आहे.
तुझ्या इश्काचा नादखुळा मालिकेतील भूमिकेविषयी सांगताना संजय नार्वेकर म्हणाला, ‘कोणतंही पात्र साकारताना त्याला वेळ आणि योग्य न्याय देता आला पाहिजे असं मला वाटतं. सिनेमा आणि नाटक सुरु असल्यामुळे मला तो वेळ मालिकेसाठी देता आला नाही. नाटक आणि सिनेमामध्ये प्रेक्षकांनी मला पाहिलं आहे. मालिकेसाठी बराच वेळ द्यावा लागतो. मात्र आता सुवर्णयोग जुळून आलाय. व्यक्तिरेखा खूप छान आहे आणि वेळेचं गणितही जमून आलं आहे.’