बिग बॉस मराठीच्या दूसऱ्या पर्वात विकेन्डला सर्वांना एक छान सरप्राइज मिळालं. ते म्हणजे या विकेन्डला बॉलिवुड सुपरस्टार सलमान खानची चक्क शोमध्ये एन्ट्री झाली. लहानपणापासून सलमान खानची चाहती असलेल्या शिवानी सुर्वेसाठी तर सलमान खानला याची देही याची डोळा पाहणं आणि त्याच्यासोबत बातचीत करायला मिळणं हा सुखद आश्चर्याचा धक्का होता.
महेश मांजरेकरांनी शिवानीचा परिचय करून देताना, ‘अँग्री यंग वुमन’ असा करून दिला. म्हणूनच सलमान खानला शोमध्ये आलेलं पाहून शिवानीने महेश मांजरेकर यांना प्रश्नही विचारला की, “सर, हे स्वप्न आहे, की सत्य हेच मला समजत नाही.”
सलमाननेही आपल्या चाहतीची थट्टा-मस्करी करायला सुरुवात केली. सलमान म्हणाला, “हो मी सलमानचा डुप्लिकेट आहे. खरं तर, मी तुला माझ्या एका फिल्ममध्ये घेणार होतो. पण तू बिगबॉसच्या घरात आहेस. तुला जर फिल्म करायची असेल, तर एक पर्याय आहे. तिथे कुणाला तरी थप्पड मारून निघून ये.. नियमांचं उल्लंघन करून टाक!”
शिवानीने यावेळी काही आठवणी सांगितल्या, 'पूर्वी सलमान खानच्या घराखाली जाऊन मी अनेकदा ‘जानम समझा करो’ चित्रपटातलं ‘जिद ना करो जरा समझा करो’ हे गाणं नेहमी गायचे.'
यावेळी शिवानीने सलमानसमोर त्याच्याच मुझसे शादी करोगे या सिनेमातलं ‘जिने के है चार दिन’ गाण्यावर डान्स करून सलमानची वाहवाही घेतली.
