प्रियांका चोप्राच्या 'द स्काय इज पिंक' चित्रपटाचे शूटिंग पूर्ण, सोशल मीडियावर शेअर केले फोटो

बॉलिवूडची 'देसी गर्ल' प्रियांका चोप्रा लवकरच 'द स्काय इज पिंक' या चित्रपटात झळकणार आहे. अलिकडेच या चित्रपटाचे शूटिंग पूर्ण झाले आहे. सोशल मीडियावर या चित्रपटाच्या टीमचे बरेच फोटो शेअर करण्यात आले आहेत.

मुंबई - बॉलिवूडची 'देसी गर्ल' प्रियांका चोप्रा लवकरच 'द स्काय इज पिंक' या चित्रपटात झळकणार आहे. अलिकडेच या चित्रपटाचे शूटिंग पूर्ण झाले आहे. सोशल मीडियावर या चित्रपटाच्या टीमचे बरेच फोटो शेअर करण्यात आले आहेत.

'द स्काय इज पिंक' या चित्रपटात प्रियांकासोबत फरहान अख्तर, झायरा वसिम हे कलाकारही मुख्य भूमिका साकारत आहेत. सोनाली बोस या चित्रपटाचे दिग्दर्शन करत आहे. मागच्या वर्षी या चित्रपटाच्या चित्रीकरणाला सुरुवात झाली होती. बऱ्याच काळापासून प्रियांका बॉलिवूडपासून दूर होती. 'बाजिराव मस्तानी' या चित्रपटानंतर ती कोणत्याही चित्रपटात दिसली नाही. सलमान खानसोबत ती 'भारत' चित्रपटात झळकणार होती. मात्र, निकसोबत लग्न करत असल्याचे कारण देऊन तिने या चित्रपटातून माघार घेतली.

'द स्काय इज पिंक' हा चित्रपट प्रेरणादायी वक्ता असलेली आयशा चौधरी यांच्या जीवनावर आधारित असल्याचं बोललं जातंय. या चित्रपटाचे शूटिंग अंदमानच्या हॅवलॉक आयलँड या ठिकाणी करण्यात आले आहे. प्रियांकाने काही दिवसांपूर्वी या ठिकाणचे फोटो सोशल मीडियावर शेअर केले होते. हा चित्रपट ११ ऑक्टोंबरला प्रदर्शित होणार आहे.