मुंबई - सिनेसंगीत जगतात ज्यांच्या संगीताने रसिकांना बेधुंद केले, ठेका धरायला लावले असे ज्येष्ठ संगीतकार चित्रगुप्त यांना यावर्षीचा मोहम्मद रफी जीवनगौरव पुरस्कार मरणोत्तर प्रदान करण्यात येणार आहे. तर प्रसिद्ध गायक सुदेश भोसले यांना रफी पुरस्कार देऊन सन्मानित करण्यात येणार आहे. मोहम्मद रफी यांच्या ९५ व्या जयंती निमित्त मान्यवरांच्या उपस्थितीत हे पुरस्कार देण्यात येणार असल्याची घोषणा माजी शिक्षण मंत्री आमदार अॅड. आशिष शेलार यांनी आज येथे केली. उद्या जम्मू काश्मीर लेफ्टनंट गव्हर्नर यांचे सल्लागार आणि लक्षद्वीपचे माजी राज्यपाल फारूख खान यांच्या हस्ते पुरस्कार वितरण होणार आहे.
मोहम्मद रफी पुरस्काराची घोषणा आमदार अॅड. आशिष शेलार यांच्या स्पंदन या संस्थेतर्फे मोहम्मद रफी यांच्या वाढदिवसा दिवशी त्यांच्या स्मृती प्रित्यर्थ दरवर्षी एका संगीत क्षेत्रातील ज्येष्ठ कलावंताला जीवन गौरव व मोहम्मद रफी पुरस्कार देऊन गौरवण्यात येते. पुरस्काराचे हे बारावे वर्ष असून ज्येष्ठ संगीतकार चित्रगुप्त यांना मरणोत्तर देण्यात येणा-या जीवन गौरव पुरस्कार एक लाख रू. धनादेश, स्मृतीचिन्ह आणि शाल श्रीफळ असे स्वरूप असून त्यांची मुल संगीतकार आनंद आणि मिलिंद हे पुरस्कार स्विकारणार आहेत. तर
सुदेश भोसले यांना देण्यात येणारा ५१ हजार रू. धनादेश आणि स्मृतीचिन्ह असे रफी पुरस्काराचे स्वरूप आहे. मोहम्मद रफी यांचे कुटुंबीय आमदार अॅड. आशिष शेलार यांच्या वांद्रे पश्चिम विधानसभा मतदार संघात वास्तव्यास असून त्यांच्या उपस्थितीत दरवर्षी हा पुरस्काराचा शानदार सोहळा रंगशारदा येथे पार पडतो. गेल्या दहा वर्षात मोहम्मद रफी यांच्या सोबत काम केलेल्या अनेक मान्यवरांना या पुरस्काराने सन्मानीत करण्यात आल्याने उत्तरोत्तर या पुरस्काराची प्रतिष्ठा वाढत गेली.
वांद्रे पश्चिम रंगशारदा येथे २४ डिसेंबर रोजी दरवर्षी प्रमाणे हा पुरस्कार वितरण सोहळा संध्याकाळी ६ वा. सुरू होणार असून यावेळी प्रसाद महाडकर यांच्या जीवनगाणीतर्फे ‘फिर रफी’ या बहारदार मैफिलीत ख्यातनाम गायक श्रीकांत नारायण हे मोहम्मह रफी यांची अजरामर गाणी सादर करणार आहेत. या कार्यक्रमाचे निवेदन संदीप कोकीळ करणार आहेत. या कार्यक्रमला प्रवेश विनामूल्य प्रवेशिकांवर देण्यात येणार आहे.
यापूर्वी संगीतकार लक्ष्मीकांत, प्यारेलाल, आनंदजी, मरणोत्तर श्रीकांत ठाकरे, गायक अमीत कुमार यांच्यासह ज्येष्ठ गायिका उषा मंगेशकर, आशा भोसले, सुरेश वाडकर, शमशाद बेगम, संगितकार रवी, शैलेंद्र सिंग, नौशाद अली, पॅरेलाल, सुमन कल्याणपूर, अनुराधा पौडवाल, खय्याम या मान्यवर कलावंतासह ख्यातनाम निवेदक अमिन सयानी यांनांही या पुरस्काराने गौरविण्यात आले आहे.