कोरोना परिस्थितीमध्ये सुधारणा होत असून मनोरंजनसृष्टीत निरनिराळे कार्यक्रम रंगू लागलेत. मराठी मनोरंजनसृष्टीत मानाचा समाजाला जाणारा झी मराठी अवॉर्ड्स सोहळा नुकताच भव्य वातावरणात पार पडला. मराठी सेलिब्रिटीजसोबत बॉलिवूडमधील सुप्रसिद्ध कलाकारांच्या उपस्थितीत दिमाखदार सोहळा रंगला. कलाकारांचे दिलखेचक परफॉरमन्स, विनोदी स्किटस् आणि सोबतीला कोणता कलाकार, कोणती जोडी, कोणती मालिका, कोणतं कुटुंब सर्वोत्कृष्ट ठरेल याची लागलेली उत्सुकता अशा वातावरणात हा कार्यक्रम रंगला. झी मराठीवरील मालिकांपैकी यंदा मन झालं बाजींद, मन उडु उडु झालं, येऊ कशी तशी मी नांदायला, माझी तुझी रेशीमगाठ, तुझ्या माझ्या संसाराला आणि काय हवं!, ती परत आलीये, रात्रीस खेळ चाले ३ या मालिकांमध्ये तीव्र चुरस बघायला मिळणार आहे.
दरवर्षीप्रमाणे यावर्षी देखील अतिशय देखण्या पद्धतीने झी मराठी अवॉर्ड्स २०२१ हा सोहळा मोठ्या दिमाखदार रूपात पार पडला. तसेच रेड कार्पेटवर सेलिब्रिटीजनी दिमाखदार पोषाखांत दमदार हजेरी लावली. यंदाचं वर्ष अजूनच खास आहे कारण यावर्षी मराठी कलाकारांसोबत हिंदीमधल्या सुप्रसिद्ध कलाकारांनी हजेरी लावली. संपूर्ण भारताला आपल्या अभिनय आणि डान्सने वेड लावणारा प्रेक्षकांचा लाडका अभिनेता गोविंदा, तसेच सुपरहिट चित्रपटांचा सुपरहिट दिग्दर्शक रोहित शेट्टी आणि आपल्या मनमोहक अदांनी आणि सौंदर्याने सगळ्यांना घायाळ करणारी अभिनेत्री कॅटरीना कैफ यांनी यावर्षी झी मराठी अवॉर्ड्सना उपस्थिती दर्शवली.