मुंबई- 'इंडियन आयडल 12'मधील युवराज मेढे याच्या ऑडिशनची एक क्लिप सोशल मीडियावर खूपच व्हायरल होत आहे. याच गाण्याच्या सेटवर तो सेटिंगचे काम करतो. ज्या सेटवर झाडू हातात घेऊन काम करतो, त्याच सेटवर त्याला गाण्याची संधी मिळाली आहे.
२८ नोव्हेंबर रोजी 'इंडियन आयडल 12' प्रसारित होणार आहे. त्यापूर्वी सोनी एंटरटेन्मेंट टेलिव्हिजन वाहिनीने युवराजचा एक प्रोमो ट्विट केला होता. तो आता व्हायरल झाल्याचे पाहायला मिळत आहे.
या व्हिडिओत युवराजला शोचे परीक्षक नेहा कक्कर, हिमेश रेशमिया आणि विशाल दादलानी विचारताना दिसतात, की गाणे कुठे शिकला. त्यावर तो म्हणतो की मी कुठेही गाणे शिकलो नाही. याच सेटवर गाण्याचे धडे गिरवले. तुम्ही जेव्हा एखाद्या स्पर्धकाला गाण्यानंतर ज्या कॉमेंट्स द्यायच्या त्या ऐकून मी गाणे शिकलो. युवराजच्या या उत्तरानंतर तिनही परीक्षकांच्या डोळ्यात पाणी तरळलेले पाहायला मिळाले.
हेही वाचा -मला कडक अ‌ॅक्शनमध्ये हात आजमवायचा आहे - अनन्या पांडे
युवराज मेढे हा जळगाव जिल्ह्यातील तरुण आहे. गाण्याची आवड असलेल्या युवराजने आपले स्वप्न पूर्ण करण्यासाठी आपली भरपूर धडपड केली. मित्रांच्यात मैफिली गाजवणारा युवराज आपली आवड जोपासण्यासाठी इंडियन ऑयडॉलच्या सेटवर दाखल झाला पण ते सेटवरील सफाई कर्मचारी म्हणून. तो एकलव्यासारखा शिकत राहिला. स्पर्धकांच्या गाण्यातील चुकांवर परीक्षक नेहमी आपल्या प्रतिक्रिया देत असतात. त्या तो समजून घेत राहिला आणि आज तो याच शोचा एक अविभाज्या भाग बनला आहे.