संगमनेर- तमाशा कलावंत रघुवीर खेडकर यांच्या मातोश्री ज्येष्ठ तमाशा कलावंत कांताबाई सातारकर यांच संगमनेरमध्ये निधन झालं. वयाच्या ८२ व्या वर्षी त्यांनी अखेरचा श्वास घेतला. त्यांच्या निधनानंतर महाराष्ट्राचे महसूल मंत्री बाळासाहेब थोरात यांनी आदरांजली वाहिली आहे. तसेच अनेकजण त्यांना श्रध्दांजली वाहात आहेत.
ज्येष्ठ लोक कलावंत कांताबाई सातारकर यांच्या निधनावर प्रतिक्रिया देताना थोरात म्हणाले की, कांताबाई सातारकर यांनी संगमनेरचे नाव राज्य पातळीवर पोहोचवले. तमाशा ही महाराष्ट्राची प्रमुख लोककला असून गेली पन्नास वर्ष या लोककलेच्या माध्यमातून कांताबाईंनी महाराष्ट्रातील जनतेची सेवा केली. महाराष्ट्रभर फिरत असताना त्यांनी संगमनेरची वैभवशाली परंपरा कायम जोपासली . आपल्या भरदार अभिनयाने त्यांनी अनेक भूमिका गाजविल्या. रायगडची राणी, डोम्या नाग ,कलंकिता मी धन्य झाले, महारथी कर्ण, हरिश्चंद्र तारामती, विशाल गड ची राणी ,कोंढाण्यावर स्वारी ,असे विविध वगनाट्य त्यांचे अजरामर ठरले. त्यातील त्यांच्या दमदार भूमिकांना लोकांनी अक्षरश डोक्यावर घेतले . कांताबाई सातारकर सह रघुवीर खेडकर या तमाशाच्या माध्यमातून सुमारे 200 कलाकारांना त्यांनी सांभाळले.
अलका, अनिता, रघुवीर, मंदा या चार मुलां मुलींनी आपल्या आईची परंपरा जोपासत सांस्कृतिक क्षेत्रात मोठे योगदान दिले आहे. या परिवाराचा संगमनेरकरांनी कायम अभिमान बाळगला असून कांताबाई सातारकर यांना राज्य पातळीवर विविध पुरस्कारांनी गौरवण्यात आले. संगमनेरमधील नागरिकांच्या वतीने त्यांच्या 75 व्या वाढदिवसाचे औचित्य साधून मोठा कृतज्ञता सोहळा आपण साजरा केला होता. त्यांच्या निधनाने महाराष्ट्राच्या संस्कृती क्षेत्राचे मोठे नुकसान झाले असून या क्षेत्रातील ज्येष्ठ तपस्वी कलावंत हरपल्याची भावना थोरात यांनी व्यक्त केली आहे.