एका महिला ज्योतिषेचे लैंगिक शोषण केल्याच्या आरोपाखाली पोलिसांनी अभिनेता करण ऑबेरॉयला अटक केली होती. या प्रकरणातील पीडित तक्रारदार महिलेवर ओशिवरा परिसरात शनिवारी दोन अज्ञात बाईकस्वारांनी येऊन धक्काबुकी करीत धमकविल्याचा आरोप पीडित महिलेने केला आहे.
शनिवारी या प्रकरणातील पीडित महिला ओशिवरा पोलीस ठाण्याच्या हद्दीत मॉर्निंग वॉकला जात असताना तिच्यावर नजर ठेवून बाईकवरून आलेल्या अज्ञातांनी पीडित महिलेच्या अंगावर एक चिट्ठी फेकत अभिनेता करण ऑबेरॉय याच्या विरोधातील तक्रार मागे घेण्यासाठी धमकविल्याचा आरोप या पीडित महिलेने केला आहे. या चिठ्ठीत TAKE THE CASE BACK असं इंग्रजी भाषेत लिहिल्याचे सांगत महिलेवर दबाव आणण्याचा आरोप या पीडितेने केला आहे. या संदर्भात ओशिवरा पोलिसांनी गुन्हा नोंदविला असून अधिक तपास सुरू आहे.