‘तू तेव्हा तशी’ मालिकेत स्वप्नील जोशी व शिल्पा तुळसकर ला साथ द्यायला येतेय अभिज्ञा भावे!

‘तू तेव्हा तशी’ ही मालिका २० मार्च पासून रात्री ८ वाजता प्रसारित होणार असून या मालिकेत अभिज्ञा भावे कुठली व्यक्तिरेखा निभावणार ही माहिती अजून तरी गुलदस्त्यातच आहे

‘खुलता कळी खुलेना’ या मालिकेतून अभिनेत्री अभिज्ञा भावे प्रेक्षकांच्या नजरेत भरली. ‘कट्टी बट्टी’, ‘तुला पाहते रे’, ‘रंग माझा वेगळा’ सारख्या मालिकांतून अभिज्ञाने विविधांगी भूमिका केल्या आहेत. आपल्या उत्कृष्ट अभिनयाने तिने सर्वांची मने जिंकली. आता ती अजून एका नवीन मालिकेतून प्रेक्षकांच्या भेटीस येत आहे. आता अभिज्ञा भावे स्वप्नील जोशी व शिल्पा तुळसकर यांना साथ द्यायला येतेय.

झी मराठीवरील 'तू तेव्हा तशी' या आगामी मालिकेची प्रेक्षकांमध्ये चर्चा सुरु आहे. या मालिकेची पहिली झलक पाहिल्यापासूनच प्रेक्षकांची मालिकेबद्दलची उत्सुकता वाढली आहे. स्वप्नील जोशी आणि शिल्पा तुळसकर ही जोडी पहिल्यांदाच या मालिकेतून प्रेक्षकांच्या भेटीस येणार आहे. या मालिकेत प्रेक्षकांचा अजून एक आवडता चेहरा एका महत्वपूर्ण भूमिकेत दिसणार आहे. अभिनेत्री अभिज्ञा भावे ही टेलिव्हिजन विश्वातील लोकप्रिय अभिनेत्री आहे. अनेक वेगवेगळ्या भूमिकांमधून अभिज्ञाने प्रेक्षकांचं मनोरंजन केलं आहे. तू तेव्हा तशी या मालिकेतून देखील अभिज्ञा छोट्या पडद्यावर पुन्हा एकदा प्रेक्षकांच्या भेटीस येणार आहे.

‘तू तेव्हा तशी’ या मालिकेचा प्रोमो आपल्या सोशल मीडियावर शेअर करत अभिज्ञा म्हणाली, "सो ऑफिशिअली मी तुम्हाला पुन्हा भेटायला येते आहे एका अशा भूमिकेत जी मला याआधी करायला मिळाली नाही.. मी आशा करते कि प्रेक्षकांकडून मला भरभरून प्रेम आणि पाठिंबा मिळेल, कारण माझी मेहनत १०० पटीने जास्त असणार आहे."

‘तू तेव्हा तशी’ ही मालिका २० मार्च पासून रात्री ८ वाजता झी मराठीवर प्रसारित होणार असून या मालिकेत अभिज्ञा कुठली व्यक्तिरेखा निभावणार ही माहिती अजून तरी गुलदस्त्यातच आहे पण तिची भूमिका प्रेक्षकांची मनं नक्की जिंकेल यात शंकाच नाही.

हेही वाचा -'लकडाऊन बी पॉझिटिव्ह' चित्रपटात आजीच्या भूमिकेत ८४ वर्षीय शुभा खोटे