अशोक सराफ यांच्यासारख्या मात्तबर कलाकाराने साकारलेली भूमिका करणे हे कोणत्याही कलाकारासाठी अभिमानाची गोष्ट असते. असे असले तरी ती तितकीच जबाबदारीची गोष्ट असते हे वेगळे सांगण्याची गरज नाही. १९७२ साली आलेल्या ‘हिमालयाची सावली’ या नाटकातील अशोक सराफ यांच्या अभिनयाने सजलेली तातोबा काशीकर ही व्यक्तिरेखा साकारण्याचे भाग्य अभिनेता विघ्नेश जोशी यांना लाभले आहे.
‘हिमालयाची सावली’ या नाटकात ही भूमिका नव्या संचात साकारणारे विघ्नेश जोशी सांगतात की, ‘मोठ्या कार्यासाठी अपमान सहन करून पाठीशी राहणाऱ्या मेव्हण्याचं हे नाटक आहे’. देवरुखच्या मातीतलं हे अस्सल ब्राह्मणी व्यक्तिमत्व मिश्कील स्वभावाचं असलं तरी तितकचं बेरकी आहे. व्यक्तिमत्वाचा स्वभाव मिश्कील असला तरी ‘त वरून ताकभात’ ओळखणाऱ्या या तातोबाचा एक स्वत:चा असा एक वेगळा अंदाज आहे तो पाहण्यातच एक वेगळी मजा आहे असं विघ्नेश जोशी सांगतात. या भूमिकेसाठी कोकणातील भाषा त्याचा लहेजा जाणून घेणं गरजेच होतं. दिग्दर्शक राजेश देशपांडे हे कोकणातील असल्याने त्यांना ही भाषा चांगलीच अवगत आहे. त्यांनी ही भाषा मला उत्तमरीत्या शिकवली.