मुंबई -आपल्या बाळाच्या ओढीने कशाचीही पर्वा न करता शिवरायांचा गड उतरणाऱ्या हिरकणीची शौर्यकथा 'हिरकणी' या चित्रपटातून पाहायला मिळणार आहे. अभिनेत्री सोनाली कुलकर्णी या चित्रपटात 'हिरकणी'च्या भूमिकेत दिसणार आहे. काही दिवसांपूर्वीच या चित्रपटाचा टीझर प्रदर्शित झाला होता. टीझरनंतर प्रेक्षकांना ट्रेलरची आतुरता होती. नुकताच या चित्रपटाचा ट्रेलर प्रदर्शित करण्यात आला आहे.
'हिरकणी'चा ट्रेलर बघताच अंगावर काटा उभा राहतो. आपल्या बाळाला भेटण्यासाठी हिरकणी कश्याप्रकारे गडाच्या कड्यावरुन खाली उतरते, याची झलक या ट्रेलरमध्ये पाहायला मिळते. घरी परतण्यासाठी तिला उशीर होतो. संध्याकाळी गडाचे दरवाजे बंद झाल्यावर थेट सकाळीच उघडण्यात येणार असतो. गडाचे दरवाजे बंद झाल्यावर हिरकणी मागे पुढे न पाहता थेट गड उतरण्याचा निर्णय घेते. आपल्या बाळाप्रती असलेली तिची ओढ, तिची व्याकुळता या ट्रेलरमध्ये अगदी उत्तमरित्या दाखवण्यात आली आहे.