मुंबई -आज देशभरात ७१ वा प्रजासत्ताक दिन साजरा करण्यात येत आहे. सोशल मीडियाच्या माध्यमातून एकमेकांना प्रजासत्ताक दिनाच्या शुभेच्छाही देण्यात येत आहेत. या सर्वांमध्ये बॉलिवूडचा किंग शाहरुख खानचा एक व्हिडिओ सध्या व्हायरल होत आहे. त्याच्या व्हिडिओची नेटकऱ्यांनी प्रशंसा केली आहे.
अलिकडेच शाहरुख खानने 'डान्स प्लस ५' या रिअ‌ॅलिटी शोमध्ये हजेरी लावली होती. या व्हिडिओमध्ये त्याने केलेलं एक वक्तव्य सध्या नेटकऱ्यांची मने जिंकत आहे. 'हिंदू - मुस्लिम असा कोणताही भेद नसतो, आपण सर्व भारतीय आहोत. माझी पत्नी हिंदू आहे. मी मुसलमान आहे. आणि माझी मुले ही भारतीय आहेत. जेव्हा सुहाना लहाना असताना तिच्या शाळेत एका फॉर्मवर धर्म लिहायचा होता. तेव्हा मी तिला सांगितले, की आपण भारतीय आहोत. आपला दुसरा कोणताही धर्म नाही', असे शाहरुखने या व्हिडिओत म्हटले आहे.