मुंबई - बॉलिवूडचा 'बाबा' म्हणजेच संजय दत्त याचा आज वाढदिवस आहे. त्याच्या वाढदिवसानिमित्त कलाविश्वातून तसेच चाहत्यांकडुन त्याच्यावर शुभेच्छांचा वर्षाव होत आहे. त्याच्या वाढदिवसानिमित्त त्याच्या आगामी 'प्रस्थानम' या चित्रपटाचा टीजर प्रदर्शित करण्यात आला आहे.
गेल्या काही दिवसांपासून 'प्रस्थानम' चित्रपटाची चर्चा सुरू आहे. संजय दत्त या चित्रपटाची निर्मिती करणार आहे. 'प्रस्थानम' नावाच्याच तेलुगू चित्रपटाचा हा हिंदी रिमेक असणार आहे. देवा कट्टा हे या चित्रपटाचं दिग्दर्शन करत आहेत. त्यांनीच तेलुगू चित्रपटाचंही दिग्दर्शन केलं होतं.
काही दिवसांपूर्वीच संजयने या चित्रपटाचं मोशन पोस्टर प्रदर्शित केलं होतं. जे प्रेक्षकांच्या पसंतीस उतरलं होतं. या चित्रपटाच्या टीजरमध्ये सर्व कलाकारांची झलक पाहायला मिळते. या टीजरमधील संजय दत्तचा 'हक दोगे तो रामायण शुरू होगी, छिनोगे तो महाभारत' हा डायलॉग प्रेक्षकांचे लक्ष वेधुन घतो. संजय दत्तने त्याच्या ट्विटर अकाऊंटवर या चित्रपटाचा टीजर शेअर केला आहे.