साऱ्या भारताला वेड लावण्यासाठी अमिताभ, चिरंजीवीसह 'सुपरस्टार्स'चा 'सैरा' येतोय

दिग्गज स्टार्स यांना एकाच चित्रपटात पाहण्याची अनोखी पर्वणी भारतीय सिने रसिकांना मिळणार आहे. सैरा नरसिम्हा रेड्डी हा चित्रपट हिंदीसह दाक्षिणात्य भाषांमध्ये रिलीज होईल. रितेश सिध्दवानी आणि फरहान अख्तर या चित्रपटाचे हिंदीमध्ये वितरण करणार आहेत.

हैदराबाद - दाक्षिणात्य सुपरस्टार्स, बॉलिवूड सुपरस्टार आणि दिग्गज स्टार्स यांना एकाच चित्रपटात पाहण्याची अनोखी पर्वणी भारतीय सिने रसिकांना मिळणार आहे. सैरा नरसिम्हा रेड्डी असे या ऐतिहासिक चित्रपटाचे शीर्षक आहे. स्वातंत्र्य दिनाच्या पूर्वसंध्येला या चित्रपटाचा मेकिंग व्हिडिओ रिलीज केला जाणार आहे. हा चित्रपट हिंदीसह दाक्षिणात्य भाषांमध्ये रिलीज होईल. रितेश सिध्दवानी आणि फरहान अख्तर या चित्रपटाचे हिंदीमध्ये वितरण करणार आहेत.

आंध्र प्रदेशातील एका लढाऊ योद्ध्याची ही कथा आहे. भारतीय स्वातंत्र्य लढ्यात ब्रिटीशांविरुध्द एल्गार पुकारणााऱ्या स्वातंत्र्य सैनिकाची ही सत्यकथा आहे. सुरेंद्र रेड्डी यांनी या चित्रपटाचे दिग्दर्शन केले असून राम चरण या चित्रपटाचा निर्माता आहे.

या चित्रपटाचे शूटींग गेली ३ वर्षे सुरू होते. हा एक बिग बजेट चित्रपट आहे. यातील फाईटच्या एका सीनसाठी तब्बल ४५ कोटी रुपये खर्च झाला आहे. यावरुन चित्रपटासाठी किती मेहनत घेतली जात आहे याचा अंदाज येऊ शकतो.

या चित्रपटाचे शूटींग जून महिन्यात पूर्ण झाले. अद्याप प्रदर्शनाची तारीख जाहीर झालेली नसली तरी याचे प्रमोशन मात्र नियोजनबध्दपध्दतीने सुरू आहे. ऑगस्टच्या संध्याकाळी या चित्रपटाचा मेकिंग व्हिडिओ रिलीज होईल. सुपरस्टार चिरंजीवी, के. सुदिप, विजय सेतुपती, जगपतीबाबू, नयनतारा, तमन्ना आणि अनुष्का शेट्टी यांच्या यात प्रमुख भूमिका आहेत. अमिताभ बच्चन यांची यात विशेष भूमिका असेल.