मुंबई -अभिनेता राजकुमार राव आणि मौनी रॉय यांचा 'मेड इन चायना' हा चित्रपट लवकरच प्रेक्षकांच्या भेटीला येणार आहे. काही दिवसांपूर्वीच या चित्रपटाचा ट्रेलर प्रदर्शित झाला. या ट्रेलरवर चाहत्यांचा मोठ्या प्रतिसाद मिळाला. शिवाय यातील 'ओढणी' हे गाणंही प्रदर्शित झालं आहे. मात्र, राजुकमारला या गाण्याद्वारेच शाहरुख खानच्या एका लोकप्रिय गाण्यावर डान्स करण्याची संधी मिळाली आहे.
होय, राजकुमार राव हा शाहरुखचा खूप मोठा चाहता आहे. राजकुमार आणि मौनीचं 'मेड इन चायना' गाणं प्रदर्शित झाल्यानंतर चाहत्यांनी या गाण्यावरही प्रतिक्रिया दिल्या. मात्र, राजकुमारच्या एका चाहत्याने तयार केलेला व्हिडिओ पाहून राजकुमारलाही हा व्हिडिओ शेअर करण्याचा मोह आवरला नाही.
खरंतर राजकुमारच्या चाहत्याने शाहरुख आणि सुष्मिता सेन यांच्या 'मै हुं ना' चित्रपटातील 'तुमसे मिलके दिल का' या गाण्याचं एडिटींग करुन राजकुमार आणि मौनीच्या गाण्याला लावलं आहे. 'मै हुं ना' जेव्हा 'मेड इन चायना' बनतो, असे कॅप्शन या चाहत्याने या व्हिडिओवर दिले आहे. हा व्हिडिओ एवढा धमाल आहे, की खरंच राजकुमार आणि मौनीने शाहरुख - सुष्मिताच्या गाण्यावर डान्स केल्याचा भास होतो.
राजकुमारने हा व्हिडिओ शेअर करुन फराह खान आणि शाहरुखला टॅग केलं आहे. '...अखेर मला शाहरुखच्या गाण्यावर डान्स करण्याची संधी मिळाली', असे त्याने या व्हिडिओवर कॅप्शन दिले आहे. नेटकऱ्यांनीही या एडिट केलेल्या व्हिडिओचं कौतुक केलं आहे
राजकुमारच्या 'मेड इन चायना' चित्रपटातील 'ओढणी' या गाण्यात मौनी आणि राजकुमारची केमेस्ट्री पाहायला मिळाली. हे गाणं एका गुजराती गाण्याचं रिक्रियेट व्हर्जन आहे. २५ ऑक्टोंबरला हा चित्रपट प्रदर्शित होईल.
