मुंबई -तब्बल १० वर्षांनंतर 'अग्निहोत्र २' ही लोकप्रिय मालिका नव्या कथेसह स्टार प्रवाहवर सुरू होत आहे. 'अग्निहोत्र'च्या पहिल्या पर्वात तीन पिढ्यांना जोडणारं सूत्र प्रेक्षकांना अनुभवता आलं. 'अग्निहोत्र २' मध्ये नेमकी कोणती गोष्ट उलगडणार याची उत्सुकता शिगेला पोहोचली आहे. दिग्गज कलाकार, कथेची गुंफण आणि दिग्दर्शन अशा गोष्टी जुळून आल्यामुळे 'अग्निहोत्र' मालिका लोकप्रियतेच्या शिखरावर पोहोचली. आता दुसऱ्या भागासाठीही जोरदार तयारी सुरु झाली आहे.
'अग्निहोत्र २' मध्ये कोणते कलाकार असतील याची प्रेक्षकांना उत्सुकता आहे. या मालिकेविषयी सांगताना 'स्टार प्रवाह'चे कार्यक्रम प्रमुख सतीश राजवाडे म्हणाले, '१० वर्षांचा काळ उलटला तरी आजही 'अग्निहोत्र'च्या आठवणी प्रेक्षकांच्या मनात कायम आहेत. एखाद्या मालिकेचा इतका प्रभाव असणं हे भारावून टाकणारं आहे. प्रेक्षकांच्या प्रेमापोटीच पुन्हा या मालिकेच्या निर्मितीचा विचार करण्यात आला आहे. जुन्या मालिकेचा आशय आणि मांडणी हे प्रत्येकानेच पाहिले असल्याने तो दर्जा टिकवणं हे आमच्यासाठीही आव्हान आहे. परंतु अभ्यासपूर्ण लेखन आणि दिग्दर्शनाची जोड देऊन एक चांगली कलाकृती मराठी रसिकांसाठी घेऊन येण्याचा प्रयत्न असेल'.