मुंबई -देशात महिलांवर होणाऱ्या अत्याचाराचे प्रमाण दिवसेंदिवस वाढतच चालले आहे. मात्र, या प्रकरणांमधील आरोपींना लवकरात लवकर कडक शिक्षा देण्यात यावी, असे अभिनेते मकरंद अनासपुरे यांनी म्हटले आहे. काही दिवसांपूर्वीच हिंगणघाट येथे झालेल्या जळीतकांडातील पीडित तरुणीचा सोमवारी सकाळी मृत्यू झाला. या पार्श्वभूमीवर राज्यभरात संतापाची लाट उसळली आहे. मकरंद अनासपुरे यांनी देखील सोशल मीडियाच्या माध्यमातून या घटनेवर हळहळ व्यक्त केली.
'हिंगणघाट प्रकरणातील भगिनीच्या मृत्यूनंतर हळहळ व्यक्त होऊन सात्विक संतापही वाटतोय. कुठलेही कारण नसताना एखाद्यावर अशा पद्धतीने जीव जाण्याची वेळे येणे ही समाजासाठी दुर्दैवी गोष्ट आहे. केंद्रशासन व न्यायव्यवस्थेला हात जोडून विनंती आहे, की अशा प्रकरणाचा लवकरात लवकर छडा लावून आरोपींना कडक शासन होणे गरजेचे आहे. निर्भया प्रकरणातील आरोपी अजूनही फासावर चढले नाहीत', तसेच तारखांवर तारखा पडत चालल्या असल्याची खंत अभिनेते मकरंद अनासपुरे यांनी व्यक्त केली.