कुमार सानू यांच्या आवाजाची चाहत्यांवर भूरळ कायम, आजही हिट आहेत 'ही' रोमॅन्टिक गाणी

उदित नारायण आणि अभिजीत यांसारख्या दिग्गज गायकांच्या काळात कुमार सानू यांनी आपली वेगळी ओळख निर्माण केली. त्यांनी गायलेल्या रोमॅन्टिक गाण्यांची क्रेझ आजही पाहायला मिळते.

मुंबई - संगीत जगतातील नावाजलेलं नाव म्हणजे कुमार सानू. आज बरेच गायक बॉलिवूडमध्ये आहेत. मात्र, त्यापैकी काहीच असे आहेत ज्यांचा आवाज प्रेक्षकांच्या मनात वर्षानुवर्षापासून रुजलेला आहे. कुमार सानू हे देखील यापैकीच एक. ९० च्या दशकात कुमार सानू यांच्या आवाजाची बॉलिवूडमध्ये दमदार छाप होती. उदित नारायण आणि अभिजीत यांसारख्या दिग्गज गायकांच्या काळात कुमार सानू यांनी आपली वेगळी ओळख निर्माण केली. त्यांनी गायलेल्या रोमॅन्टिक गाण्यांची क्रेझ आजही पाहायला मिळते.

कुमार सानू यांचा जन्म २३ सप्टेंबर १९५७ साली कोलकाता येथे झाला होता. त्यांचे वडील पशुपति भट्टाचार्य हे देखील प्रसिद्ध संगीतकार होते. त्यामुळे संगीताचं बाळकडू त्यांना बालपणीच मिळालं. ज्यावेळी कुमार सानू यांनी संगीत क्षेत्रात पदार्पण केलं त्यावेळी किशोर कुमार यांचीही क्रेझ होती. मात्र, त्यांच्या निधनानंतर संगीत क्षेत्रात पोकळी निर्माण झाली. अशात कुमार सानू यांनी आपल्या आवाजानं ही पोकळी भरुन काढण्याचा प्रयत्न केला. त्यांच्या वाढदिवसानिमित्त जाणून घेऊयात त्यांनी गायलेल्या रोमॅन्टिक गाण्यांबद्दल...

कुमार सानू

'मेरा दिल भी कितना पागल है'
'साजन' चित्रपटातील 'मेरा दिल भी' हे गाणं आजही लोकप्रिय आहे. कुमार सानूसोबत अलका याज्ञिक यांनी हे गाणं गायलं होतं.

'एक लडकी को देखा तो ऐसा लगा'
अनिल कपूर यांच्या '१९४२ - अ लव्ह स्टोरी' या चित्रपटातील हे गाणं देखील सुपरडुपरहिट झालं होतं. जावेद अख्तर यांनी हे गाणं कंपोज केलं होतं. तर, आर.डी. बर्मन यांनी या गाण्याला संगीत दिलं होतं. या चित्रपटातील सर्वच गाणी हिट झाली होती. मात्र, 'एक लडकी को देखा' या गाण्याची वेगळीच क्रेझ आजही पाहायला मिळते.

'धीरे धीरे प्यार को बढाना है'
'फुल और कांटे' चित्रपटातील हे गाणंही खूपच सुंदर आहे. या गाण्यालाही कुमार सानू आणि अलका याज्ञिक यांच्या आवाजाचा स्वरसाज चढला आहे.

'धीरे धीरे से मेरी जिंदगी मे आना'
'आशिकी' चित्रपटाची जेव्हाही चर्चा होते तेव्हा या गाण्याचा नक्कीच उल्लेख होतो. या चित्रपटातीलही सर्व गाणी सुपरहिट ठरली होती. ही गाणी गाऊन कुमार सानू देखील सुपरहिट झाले होते. या गाण्यात त्यांच्यासोबत अनुराधा पौडवाल यांनी आवाज दिला होता.

'दर्द करारा'
कुमार सानू यांनी मोठ्या ब्रेकनंतर आयुष्मान खुरानाच्या 'दम लगाके हैशा' या चित्रपटात हे गाणं गायलं होतं. या चित्रपटात आयुष्मानसोबत भूमी पेडणेकरने बॉलिवूडमध्ये पदार्पण केलं होतं. कुमार सानूसोबत साधना सरगम यांनी हे गाणं गायलं होतं. या गाण्यात ९०च्या दशकातील संगीताचा तडका लागला होता.