मुंबई -अभिनेता जॉन अब्राहम सत्य घटनेवर आधारित असलेल्या 'बाटला हाऊस' या चित्रपटात मुख्य भूमिकेत झळकणार आहे. या चित्रपटात त्याच्यासोबत अभिनेत्री मृणाल ठाकुर हीदेखील भूमिका साकारत आहे. अलिकडेच या चित्रपटाचा ट्रेलर प्रेक्षकांच्या भेटीला आला. या ट्रेलरवर चाहत्यांनी भरभरुन प्रतिक्रिया देखील दिल्या. आता या चित्रपटात जॉन आणि मृणालवर चित्रीत असलेले नवे गाणे प्रदर्शित करण्यात आले आहे.
'बाटला हाऊस एनकाउंटर'वर आधारित हा चित्रपट आहे. नुकतेच प्रदर्शित करण्यात आलेल्या गाण्यात जॉन आणि मृणाल यांच्यातील नातेसंबध उलगडण्यात आले आहेत. या चित्रपटात दोघेही पती- पत्नीच्या भूमिकेत दिसणार आहेत. जॉन पोलीस अधिकाऱ्याची भूमिका साकारत आहे. त्यामुळे त्याच्या नोकरीमुळे त्यांच्या नात्यात कशाप्रकारे दुरावा निर्माण होतो, हे गाण्यात पाहायला मिळते. अंकित तिवारी आणि ध्वनी भानुशाली यांनी हे गाणे गायले आहे.