मुंबई - अभिनेत्री गौहर खान हिने राहुल गांधी यांच्या समर्थनार्थ ट्विट केल्यामुळे ती चर्चेत आली आहे. पंतप्रधान नरेंद्र मोदी यांनी भारताचे दिवंगत माजी पंतप्रधान राजीव गांधी यांच्याबद्दल विधान केले होते. त्यावरुन बरेच वाद तयार झाले आहेत. बिग बॉस विजेत्या गौहरने या वादात ट्विट करुन आपली भूमिका मांडली आहे.
गौहरने ट्विटमध्ये लिहिलंय, ''तुमच्याबद्दल माझ्या मनांत आदर आहे. तुमचे वडील दिवंगत राजीव गांधी हे सन्माननिय पंतप्रधान होते. त्यामुळे त्यांच्याबद्दल आकस असू शकतो. तुम्ही तुमचा सन्मान कायम राखला आहे. तुम्ही अजून मजबूत व्हा राहुल गांधी.'' असे म्हणत गौहरने केलेल्या ट्विटचे अनेक जण कौतुक करीत आहेत तर काहींनी तिला ट्रोल करायलादेखील सुरूवात केली आहे.
सध्या सुरू असलेल्या लोकसभा निवडणूकीमध्ये आरोप प्रत्यारोपांच्या फैरी झडत आहेत. पंतप्रधान नरेंद्र मोदी यांनी राजीव गांधी आणि काँग्रेसवर टीका करताना माजी पंतप्रधानांबद्दल वादग्रस्त विधान केले होते. मोदी म्हणाले होते, ''तुमच्या वडिलांना राजदरबाऱ्यांनी मिस्टर क्लिन ठरवले होते. पण त्यांचा अंत भ्रष्टाचारी नंबर १ म्हणून झाला. जो अहंकार तुम्ही बाळगलाय त्याचाही अंत होईल. हा देश चुका करणाऱ्यांना माफ करेल मात्र विश्वासघात करणाऱ्यांना नाही.''