मुंबई- हैदराबाद येथे पशुवैद्यकीय महिला डॉक्टरवर अत्याचार करून नंतर हत्या केल्याची घटना घडली होती. त्यानंतर अवघ्या देशात संतापाचे वातावरण निर्माण झाले आहे. आरोपींना फाशीची शिक्षा लवकरात लवकर द्यावी, या मागणीसाठी अनेक शहरांमध्ये आंदोलने करण्यात येत आहेत. मात्र, एका चित्रपट निर्मात्याने खळबळजनक पोस्ट सोशल मीडियावर शेअर केली आहे. यात महिलांनी बलात्कारासाठी सहकार्य करण्याचा सल्ला त्याने दिला आहे. डेनियल श्रवण असे त्या चित्रपट निर्मात्याचे नाव आहे.
हेही वाचा -हैदराबाद महिला डॉक्टर अत्याचार व हत्या प्रकरण; सुनावणीसाठी विशेष न्यायालयाची स्थापना
महिलेची हत्या न करता गुन्हेगारांनी अत्याचार करून थांबावे, यासाठी सरकारने कायदेशीर तरतुदी करून प्रोत्साहन देण्याची विचित्र मागणी डेनियल श्रवणने सोशल मीडियाच्या माध्यामातून केली आहे. तसेच १८ वर्षांवरील मुलींनाही याबाबत प्रशिक्षित करण्यात यावे असेही त्याने म्हटले आहे. दरम्यान, महिलांनी कंडोम बाळगा आणि बलात्काऱ्यांना सहकार्य करा, असे वादग्रस्त ट्विट त्याने केले आहे.
ही पोस्ट सोशल मीडियावर प्रचंड व्हायरल झाली आहे. त्यानंतर नेटकऱ्यांनी त्याला चांगलेच धारेवर धरत संताप व्यक्त केला आहे. मात्र, त्यानंतर लगेच श्रवणने त्याची ही पोस्ट डिलीट केली आहे.
