मुंबई - अभिनेता आयुष्मान खुराना 'ड्रीमगर्ल' चित्रपटानंतर त्याच्या 'बाला' चित्रपटासाठी सज्ज झाला आहे. काही दिवसांपूर्वीच या चित्रपटाचा टीजर प्रदर्शित करण्यात आला होता. या चित्रपटाच्या टीजरनंतर अभिनेता सनी सिंग याच्याही 'उजडा चमन' या चित्रपटाचा ट्रेलर प्रदर्शित झाला. मात्र, हा ट्रेलर पाहुन या चित्रपटाची कथा एकाच विषयावर आधारित असल्याचं स्पष्ट होत आहे. त्यामुळे या दोन्ही चित्रपटांमध्ये चांगलीच चुरस निर्माण होणार आहे.
आता 'बाला' चित्रपटाचं नवं पोस्टर प्रदर्शित करुन चित्रपटाच्या प्रदर्शनाची नवी तारीखही जाहीर करण्यात आली आहे. आज (१० ऑक्टोंबर) या चित्रपटाचा ट्रेलरही प्रदर्शित करण्यात येणार आहे. ७ नोव्हेंबरला हा चित्रपट प्रदर्शित होणार आहे.
तर, दुसरीकडे सनी सिंगच्या 'उजडा चमन' चित्रपटाची तारीखही जाहीर झाली आहे. ८ नोव्हेंबरला 'उजडा चमन' चित्रपट प्रेक्षकांच्या भेटीला येणार आहे. या दोन्हीही चित्रपटात टक्कल असणाऱ्या व्यक्तीची कथा दाखवण्यात येणार आहे. टक्कल असल्यामुळे कमी वयातच कोणकोणत्या परिस्थितीला सामोरे जावे लागते, याची कथा यामध्ये पाहता येणार आहे. शिवाय 'उजडा चमन' चित्रपटाच्या ट्रेलरनेही चाहत्यांची मने जिंकली आहेत.