मुंबई - अभिनेता आयुष्मान खुराना बॉलिवूडमध्ये त्याच्या वेगळ्या धाटणीच्या चित्रपटासाठी ओळखला जातो. दमदार कथानक आणि आपल्या अभिनयाच्या जोरावर आयुष्मानने आघाडीच्या अभिनेत्यांमध्ये स्थान मिळवले आहे. आता पुन्हा एकदा प्रेक्षकांचे निखळ मनोरंजन करण्यासाठी आयुष्मान पुन्हा एकदा पडद्यावर झळकणार आहे. त्याच्या आगामी 'ड्रीमगर्ल' चित्रपटाचा ट्रेलर अलिकडेच प्रदर्शित करण्यात आला. या ट्रेलरने सध्या सोशल मीडियावर धुमाकूळ घातला आहे.
या चित्रपटात आयुष्मानसोबत अभिनेत्री नुसरत भरुचा देखील झळकणार आहे. पण, 'ड्रीमगर्ल' म्हणून आयुष्मानच प्रेक्षकांच्या भेटीला येणार आहे. चित्रपटाचा ट्रेलर पाहून चाहते अक्षरश: आयुष्मानच्या प्रेमात पडले आहेत. आत्तापर्यंत या ट्रेलरवर ११ मिलीयनपेक्षा जास्त व्हिव्ज मिळाले आहेत. तर, यूट्यूबच्या टॉप १० ट्रेण्डींग व्हिडिओमध्ये या ट्रेलरची वर्णी लागली आहे.