'मुबारक हो टुकडे टुकडे भाजप', जामिया गोळीबारावर अनुराग कश्यपची तीव्र प्रतिक्रिया

दिग्दर्शक अनुराग कश्यप याने या घटनेसंबधी एक ट्विट केले आहे. आपल्या ट्विटच्या माध्यमातून त्याने भाजप सरकारवर निशाणा साधला आहे.

मुंबई - जामिया मिलिया इस्लामिया विद्यापीठाच्या विद्यार्थ्यांनी आयोजित केलेल्या मोर्चादरम्यान एका तरुणाने गोळीबार केला. तो स्वतःला रामभक्त म्हणतो. दिल्लीच्या जेवर परिसरातील तो रहिवासी आहे. या घटनेचा व्हिडिओ सोशल मीडियावर प्रचंड व्हायरल झाला आहे. या घटनेबाबत कलाविश्वातील कलाकारांनीही संताप व्यक्त केला आहे. दिग्दर्शक अनुराग कश्यप यानेही या घटनेसंबधी एक ट्विट केले आहे. आपल्या ट्विटच्या माध्यमातून त्याने भाजप सरकारवर निशाणा साधला आहे.

जामिया येथे झालेल्या गोळीबारावर अनुरागने आपल्या ट्विटमध्ये लिहिले आहे, की 'जय श्रीराम व भारत माता की जय म्हणा आणि हिंदूत्वाच्या नावाखाली काहीही करा. तुम्हाला थांबवणारं कोणी नाही. कारण, आता असा संशय येतोय की सरकारच दहशदवादाला पाठिंबा देत आहे'.

हेही वाचा -जामिया विद्यापीठ हिंसाचार : दिल्ली पोलीसांकडून 70 संशयितांची छायाचित्रे प्रसिद्ध

आपल्या दुसऱ्या ट्विटमध्ये त्याने लिहिले आहे, की 'आश्चर्याची गोष्ट आहे सर्व हिंदूत्ववादी दहशतवाद्यांना वाटते की ते देशभक्त आहेत. नरेंद्र मोदी, अमित शाह आणि भाजपने गेल्या सहा वर्षात हे साध्य करुन दाखवले. अभिनंदन तुकडे तुकडे भाजप'.

अनुराग कश्यपचे हे दोन्ही ट्विट व्हायरल झाले आहेत. तो समाजात घडणाऱ्या विविध घटनांवर आपलं स्पष्ट मत व्यक्त करत असतो. त्यामुळे काही युजर्स त्याला ट्रोल देखील करताना दिसतात.

हेही वाचा -'जामिया'त तरुणाचा आंदोलकांवर गोळीबार, कुटुंबीयांना बसला धक्का