मुंबई -'देवमाणूस', 'तुझ्यात जीव रंगला' या टीव्ही मालिका यात काम करणारी अभिनेत्री, नृत्यांगना माधुरी पवार आगामी 'दिशाभूल' या मराठी चित्रपटात महत्वपूर्ण भूमिकेत दिसणार आहे. सानवी प्रॉडक्शन हाऊसची पहिली निर्मिती असलेल्या 'दिशाभूल' या मराठी चित्रपटाचा मुहूर्त नुकताच पुण्यात संपन्न झाला.
‘दिशाभूल’ या चित्रपटात माधुरी पवारबरोबर ‘मिसेस मुख्यमंत्री’ मालिकेतून घराघरात पोहोचलेली अभिनेत्री अमृता धोंगडे आणि ‘फुलपाखरू’ फेम अभिनेता तेजस बर्वे ही लोकप्रिय जोडी पुन्हा एकदा एकत्र दिसणार आहे. याचबरोबर या चित्रपटात प्रसिद्ध अभिनेते शशांक शेंडे, प्रणव रावराणे, अरुण कदम, सिद्धेश्वर झाडबुके, आशुतोष वाडेकर, शुभम मांढरे आणि अभिनेत्री प्रिया बेर्डे अशी तगडी स्टारकास्टही दिसणार आहे. या चि6पटात तेजससह मुख्य भूमिकेतील दूसरा अभिनेता कोण? याची उत्कंठा आता प्रेक्षकांना लागली आहे.
दिशाभूल हा वेगळा प्रयोग
चित्रपटाबद्दल बोलताना निर्मात्या आरती चव्हाण म्हणाल्या, “‘दिशाभूल’ हा सानवी प्रॉडक्शन हाऊसचा पहिला चित्रपट आहे. तरुण कलाकारांना संधी देतानाच दिग्गज कलाकारांना आम्ही सोबत घेतले आहे. 'दिशाभूल' मधून आम्ही करत असलेला वेगळा प्रयोग प्रेक्षकांना भावेल असा विश्वास वाटतो.” दिशाभूल’ हा आजच्या तरुणाईचा चित्रपट आहे. कॉलेजमधील मुलांची ही अनोखी कथा असून यामध्ये फ्रेंडशिप, रोमान्स आणि सस्पेन्स थ्रीलर असा ट्रिपल धमाका असणार आहे. असल्याचे दिग्दर्शक आशिष कैलास जैन म्हणाले.