अक्षयच्या 'बेल बॉटम'ची नवी तारीख तर दीपिकाच्या नव्या चित्रपटाची घोषणा, वाचा मनोरंजन विश्वातील घडामोडी

अक्षय कुमार आणि दीपिका पदुकोण यांनी आपल्या आगामी चित्रपटाच्या प्रदर्शनाच्या तारखा सोशल मीडियावर जाहीर केल्या आहेत.

मुंबई -बॉलिवूडमध्ये एकापाठोपाठ एक बिग बजेट चित्रपटांची निर्मिती करण्यात येत आहे. त्यामुळे बॉक्स ऑफिसवरही तगडी शर्यत पाहायला मिळते. यंदाची सुरुवातही 'छपाक' आणि 'तान्हाजी द अनसंग वॉरिअर' या दोन चित्रपटांच्या शर्यतीने झाली. यामध्ये 'तान्हाजी' चित्रपटाने बाजी मारली. येणाऱ्या काळातही बऱ्याच चित्रपटांची चुरस पाहायला मिळणार आहे. अक्षय कुमार आणि दीपिका पदुकोण यांनी आपल्या आगामी चित्रपटाच्या प्रदर्शनाच्या तारखा सोशल मीडियावर जाहीर केल्या आहेत.

दीपिका पदुकोणने यंदा 'छपाक' चित्रपटाने वर्षाची सुरुवात केली. बॉक्स ऑफिसवर या चित्रपटाला चांगला प्रतिसाद मिळाला. मात्र, अजय देवगणच्या 'तान्हाजी' चित्रपटासमोर 'छपाक'ची गती मंदावली होती. आता दीपिकाने आपल्या नव्या चित्रपटाची घोषणा केली आहे. 'इंटर्न' असे या चित्रपटाचे नाव आहे. यामध्ये ती ज्येष्ठ अभिनेते ऋषी कपूर यांच्यासोबत भूमिका साकारणार आहे. पुढच्या वर्षी हा चित्रपट प्रदर्शित होणार आहे.

ऋषी कपूर यांनीही या चित्रपटाची माहिती सोशल मीडियावर शेअर केली आहे.

दुसरीकडे अक्षय कुमारही त्याच्या आगामी चित्रपटाची तयारी करत आहे. मागच्या वर्षीप्रमाणेच यंदाही तो बऱ्याच चित्रपटांमध्ये झळकणार आहे. याच नाही तर, आता २०२१ साठी देखील तो चित्रपटांच्या तारखांचं नियोजन करत आहे. त्याचा 'बच्चन पांडे' हा चित्रपट यावर्षी नोव्हेंबर महिन्यात प्रदर्शित होणार होता. मात्र, आमिर खानच्या 'लाल सिंग चढ्ढा' चित्रपटासाठी अक्षयने या चित्रपटाची रिलीझ डेट बदलली आहे. आता हा चित्रपट २२ जानेवारी २०२१ ला प्रदर्शित होणार आहे.

या चित्रपटानंतर तो 'बेल बॉटम' या चित्रपटात देखील मुख्य भूमिकेत दिसणार आहे. हा चित्रपट २ एप्रिल २०२१ रोजी प्रदर्शित होणार आहे.

महानायक अमिताभ बच्चन हे सोशल मीडियावर बऱ्यापैकी सक्रिय असतात. त्यांनी एका महिला शिक्षिकेचा व्हिडिओ शेअर केला आहे. ही महिला गणित विषय अतिशय सोप्या पद्धतीने शिकवताना या व्हिडिओत दिसते. ही शिक्षिका अद्भुत आहे, असे अमिताभ बच्चन यांनी व्हिडिओवर कॅप्शन दिले आहे.