मुंबई - ह्रतिक रोशन आणि टायगर श्रॉफच्या 'वॉर' चित्रपटाला प्रेक्षकांनी प्रचंड उचलून धरले आहे. जबरदस्त अॅक्शन आणि खतरनाक स्टंट्स असलेल्या या चित्रपटाने बॉलिवूडमध्ये इतिहास रचला आहे. रिलीजच्या पहिल्याच दिवशी तब्बल ५३. ३५ कोटींची कमाई चित्रपटाने करत आजपर्यंतचे कमाईचे सर्व विक्रम मागे टाकले आहेत. हा चित्रपट हिंदीसह तेलुगु आणि तामिळ भाषेतही रिलीज करण्यात आला आहे.
ह्रतिक आणि टायगर या दोघांचाही सर्वाधिक कमाईचा हा पहिलाच चित्रपट ठरलाय. अमिताभ आणि आमिरच्या 'ठग्ज ऑफ हिंदुस्थान'ने पहिल्याच दिवशी ५२. २५ कोटींची कमाई करत विक्रम केला होता. मात्र, हा चित्रपट प्रेक्षकांनी नाकारला होता. वॉर चित्रपटाला मात्र प्रेक्षकांनी स्वीकारल्याचे चित्र देशभर पाहायला मिळाले. वॉर चित्रपटाने हिंदीत ५१.६० कोटींची कमाई केली. तर तामिळ आणि तेलुगुमध्ये चित्रपटाने १. ७५ कोटींची कमाई केली. भारतात एकूण ५३. ३५ कोटींची कमाई केल्याने बॉलिवूडचा हा सर्वाधिक कमाई पहिल्या दिवशी करणार चित्रपट ठरला आहे.
वॉर हा चित्रपट २ ऑक्टेबरला गांधी जयंतीच्या दिवशी म्हणजे सुट्टीच्या दिवशी रिलीज झालाय. पहिल्या आठवड्याची कमाई करण्यासाठी चित्रपटाला पुरेपुर ५ दिवस मिळालेत. शनिवार रविवारची सुट्टी आणि विकेंडमुळे चित्रपट पहिल्या आठवड्याच्या कमाईतही विक्रम स्थापन करु शकतो. राष्ट्रीय सुट्टीच्या दिवशी इतकी कमाई करणाराही हा पहिलाच चित्रपट ठरलाय.