WAR Trailer : डोळ्यांची पारणे फेडणारा, अचाट वेगवान अॅक्शनचा डबल धमाका

ह्रतिक रोशन आणि टायगर श्रॉफ यांची जबरदस्त अॅक्शन 'वॉर' चित्रपटात पाहायला मिळणार आहे. याची झलक चित्रपटाच्या ट्रेलरमध्ये पाहायला मिळते.

मुंबई- ह्रतिक रोशन आणि टायगर श्रॉफ यांच्या बहुप्रतीक्षित 'वॉर' चित्रपटाचा ट्रेलर अखेर प्रदर्शित झाला. नेत्रदिपक स्टंट्स, वेगवान अॅक्शन आणि थरकाप उडवणारी दृश्ये यांचा भरणा ट्रेलरमध्ये दिसतो. ह्रतिक आणि टायगरची ऑनस्क्रिन केमेस्ट्री पाहण्यासारखी आहे.

ह्रतिक आणि टायगर श्रॉफ यांच्या चाहत्यांसाठी 'वॉर' हा चित्रपट पर्वणी ठरणार आहे. चित्रपटाबद्दलची उत्कंठा वाढवण्यात ट्रेलर यशस्वी झाल्याचे दिसते. 'सुपर थर्टी' चित्रपटानंतर ह्रतिक पुन्हा पहिल्या फॉर्ममध्ये आल्याचे दिसत आहे. 'वॉर' चित्रपटातील भव्यता आणि सुसाट वेग ह्रतिकच्या करियरला उंच शिखरावर पोहोचवेल अशी अपेक्षा त्याचे चाहते करु शकतात.

'वॉर' हा थरारपट सिध्दार्थ आनंद यांनी दिग्दर्शित केला आहे. २ ऑक्टोबरला हा चित्रपट प्रेक्षकांच्या भेटीस येणार आहे. हिंदी, तामिळ आणि तेलुगु भाषेत हा चित्रपट प्रदर्शित होईल.