मुंबई : बॉलिवूड चित्रपट निर्माता करण जोहर आपल्या दोन दशकाच्या कारकिर्दीत पहिल्यांदाच 'तख्त' या एका ऐतिहासिक विषयावरील चित्रपटाची निर्मिती करण्याचे स्वप्न उराशी बाळगून होता. त्याचा हा महत्वकांक्षी चित्रपट मात्र शुटिंग फ्लोअरवर पोहोचू शकलेला नाही. सध्या तरी त्याचे हे स्वप्न अपुरे राहिले आहे असेच म्हणावे लागेल.
तख्त हा एक ऐतिहासिक विषय असलेला चित्रपट आहे. औरंगजेब आणि त्याचा भाऊ दारा शुकोह यांच्यात सिंहासन मिळवण्यासाठी झालेल्या वैराची कथा यात दाखवण्यात येणार होती. या चित्रपटाचे प्री प्रॉडक्शनचे काम पूर्ण झाले होते. इतकेच नाही तर चित्रपटाचे कलाकारही निश्चित झाले आहेत. यात औरंगजेबची भूमिका विकी कौशल साकारणार होता तर दारा शुकोहच्या भूमिकेत रणवीर सिंगची निवड करण्यात आली होती. चित्रपटाच्या मल्टीस्टार कास्टमध्ये आलिया भट्ट, करिना कपूर, भूमी पेडणेकर, जान्हवी कपूर आणि अनिल कपूरसुद्धा होते.